Box Office : Demon Slayer-in Mortal Kombat a lehthal

Box Office-ah thil danglam a thleng a, kar hmasa lama sum lalut tam ber Mortal Kombat chu kar hmasa lama pahnihna Anime movie Demon Slayer: Mugen Train-in a lehthal.

Demon Slayer Vs Mortal Kombat
Kar hmasa lamah khan Mortal Kombat leh Demon Slayer: Mugen Train-te hi an inum zak zak tawh a, a tawpah Mortal Kombat a dingchang hram a, an sum lakluh pawh a inthlau lo viau.

Tunkarah pawh anni pahnih bawk hi an inum leh, kar hmasa lama dinhmun ṭhaa ding zawk Mortal Kombat chuan pakhatna dinhmun a humhim zo ta lo a, Demon Slayer: Mugen Train chu pakhatna a rawn ni ve ta thung a ni. An sum lakluh pawh a inthlau lo a, Demon Slayer hian $6,412,933 a lakluh laiin Mortal Kombat chuan $6,235,000 a lalut thung.

Hetihlai hian Motal Kombat hi theatre 3114 laiah chhuah a ni a, Demon Slayer hi chu theatre 1,905-ah an chhuah thung a, Demon Slayer hian ngaihlutu a ngah zawk a tih theih ang.

Demon Slayer: Mugen Train hi a hit zel a, khawchhak lam Box Office nasa taka a run hnuah khawthlang lam pawh zuah a tum bik lo a, US leh a chhevelah ro a rel leh mek a ni. Tunah hian ram hrang hrang Box Office aṭangin $mtd 469.1 a lalut tawh.

Sakhawlh pahnih insualna film Godzilla vs. Kong chu pathumna a ni a, $2,820,000 a la lalut phak a ni.

Film thar Separation palina
Palina chu Zirtawpnia tlangzarh thar horror film Separation a ni. Rupert Friend, Mamie Gummer leh Madeline Brewer-te channa hian kar tawp liam taah khan $1,800,162 a lalut.

Pangana chu Raya and the Last Dragon kha niin kar hmasaa a dinhmun ngaiah a la ding a ni.

Film thar dangte
Box Office Mojo chart-ah chuan Separation bakah hian film thar dang pali a la awm. Four Good Days (11), The Resort (16), Limbo (17) leh Endless Rain (29)-te chu film thar chart-a lang phate an ni.

Box Office-a sum lengvak a tam ve telh telh a, theatre pawh an hawng hnem sawt hle. Mortal Kombat hi theatre 3k chuangah an chhuah a, Godzilla Vs Kong hi theatre 2.5k chuangah an chhuah bawk. Hetiang a nih chhoh zel chuan kumin chhung hi chuan film thar ṭha tak tak an tlangzarh nual a beiseiawm.