Red Hot Chili Peppers Hipgnosis-ah an hla catalog hralh dawn

American rock band Red Hot Chili Peppers chuan an hla catalog Hipgnosis Songs hnenah $maktaduai 140-in an hralh dawn niin Variety chuan an tarlang.

Hman deuh khan music legend Bob Dylan chuan a catalog chu Universal Music Publishing hnenah $mtd 300 chuangin a lo hralh tawh bawk a, RHCP hian Bob Dylan hnung hi an zui dawn a nih hmel.

Kum 1982-a indin RHCP hian hla lar tak tak an nei ngah hle a, 'Under the Bridge' aṭanga 'Californication' thlengin hla lar em em a ni hlawm. Heng an hlate hi anmahni phuah a ni tlangpuia, Billboard-in a tarlan dan chuan Moebetoblame Music enkawl a ni. An catalog hralh tum chungchangah hian an band lam chuan engmah an la sawi chhuak lo thung.

Hetihlai hian drummer Chad Smith chuan tunhnai lawk khan album thar an buaipui mek tih a sawi a, hemi chungchang hi Music Business Worldwide chuan tarlang hmasain Billboard lam pawhin an tarlang tawh bawk. An guitarist duhlai John Frusciante an band-ah a let leh tawh bawk a, album thar kan ngaithla thuai thei turah ngai ang.