Billboard The Hot 100-ah The Weeknd & Ariana Grande

Billboard Hot 100 chart-ah The Weeknd & Ariana Grande 'Save Your Tears' chu pakhatna a ni. Silk Sonic (Bruno Mars & Anderson .Paak) 'Leave The Door Open' chu pahnihna a la ni a, pathumna chu Justin Bieber feat. Daniel Carsae & Giveon kha a ni thung.

'Save Your Tears' a hot
'Save Your Tears' hla hrim hrim hi chu hla thar em em a ni tawh loa, nikuma Canadian singer The Weeknd album tihchhuah 'After Hours'-a mi kha niin single-a a tihchhuah tirh pawhin ram panga chart-ah top 5 a thleng hial.

April 22 khan American singer Ariana Grande nen a remix tichhuak lehin a rawn hit thar leh hle a, kar hmasa lamah khan Hot 100 chart-ah parukna a ni a, tun karah erawh pakhatnaah a rawn invawrh ta a ni. He hla avang hian Ariana leh The Weeknd-te hian Billboard Hot 100 chart-ah No.1 single paruk ve ve an neih phah ta hial bawk.

Ariana nena an remix a tihchhuah hi animated music video-in an siam a, tunlaia US-a hla lar ber a ni leh ta a ni. The Weeknd leh Ariana Grande-te hi a hmain 'Off the Table' leh 'Love Me Harder' hlaahte an lo thawk dun tawh a, tuna an hla tihchhuah hi hla pathum an tihchhuah dunna a ni tawh.

The Weeknd & Ariana Grande 'Save Your Tears' hi tunkarah hian Global 200 chart-ah pawh topper a ni a, Global Excl. US chart-ah chuan pahnihna a ni bawk.

Artist 100 chart-ah chuan The Weeknd hi pathumna a ni mek a, Ariana Grande erawh pariatna a ni thung.

Hot 100 chart-a dinhmun sang luahtute
Chart topper pawh lo ni tawh Silk Sonic (Bruno Mars & Anderson .Paak) 'Leave The Door Open' chu pahnihna a la ni phak a, he hla hi Hot 100 chart-ah hian kar riat chhung a lang tawh a ni. Pathumna Justin Bieber-te hla 'Peaches' pawh hi kar ruk chhung chart-ah a lang tawh a, pakhatna hialte pawh a lo ni ve tawh bawk.

Polo G 'Rapstar' chu palina niin Dua Lipa leh DaBaby thawhdunna hla 'Levitating' chu pangana a ni.

Billboard 200 chart ve thung
Billboard 200 album chart-ah chuan Moneybagg Yo 'A Gangsta's Pain' pakhatna a ni a, he album hi Moneybagg Yo studio album palina a ni. April 23-a a tlangzarh kha niin Billboard 200 chart topper album a neih hmasak ber a ni bawk.

Kar hmasa lama pakhatna Young Thug & Various Artists 'Young Stoner Life: Slime Language 2' chu pahnihna a ni ve thung a, Morgan Wallen-a album hit 'Dangerous: The Double Album' chu pathumna a la ni pha a ni. 'Dangerous: The Double Album' hi kar 16 chhung chart-ah a lang tawh a, a che ṭha pawl a la ni char char.

Artist 100 chart topper ni mek Eric Church album 'Soul' chu palina a ni a, Justin Bieber 'Justice' chu pangana a ni thung.