Spider-Man 3-ah Andrew Garfield kan hmu dawn lo

The Amazing Spider-Man star Andrew Garfield chuan Spider-Man: No Way Home-ah a inlan dawn lo tih a sawi.

Spider-Man: No Way Home hian nikum lam aṭang tawh khan ngaihven a hlawh a, spide-verse thar kan hmu dawn nia sawitu an tam a, Tobey Maguire leh Garfield pawh an rawn inlan leh dawn nia sawite pawh an awm nual. Hemi chungchangah hian hun rei tak chhung a ngawih hnuah Thawhlehni khan Happy Sad Confused podcast-ah Garfield chu a ṭawng chhuak ta a, "Thildang chu ka sawi thei lo. Eng emaw tak an buaipui pawh a ni mahna, mahse kei chuan call ka dawng ve lo," a ti.

No Way Home chungchanga titi a tam pawh a awm viau tho mai. Spider-Man film hmasaa Doctor Octopus lema chang Alfred Molina a inlan leh dawn tih a chiang tawh a, The Amazing Spider-Man-a Electro lema chang Jamie Foxx pawh a inlan leh dawn tih a chiang bawk. Hei vang hian mi tam tak chuan Spider-Man universe thar a awm dawn niin an ngai.

Spider-Man: No Way Home hi December 17-ah Sony leh Marvel ṭangkawp chuan tihchhuah an tum a ni.