Africa-ah naupang ruhro kum 78,000 kal taa phum an lai chhuak

Africa rama mihring, phumna rei tawh ber a ni hial em?

Ningani khan 'Nature'-a report tihchhuahah chuan Africa khawchhak lama puk pakhatah naupang ruhro upa tak, kum 78,300 vela liam taa an phum nia hriat an lai chhuak a, hei hi Africa ramah chuan hriat theih china mihring an phum hriat theih hlui ber niin ruhro laichhuaktu mithiamte chuan an sawi. An ruhro laihchhuah chu 'Mtoto' tiin a hming an vuah a, hei hi Swahili ṭawng niin 'Naupang' tihna a ni.

Max Planck Institute for the Science of Human History, Jena-a an archeologist pakhat chuan Mtoto chu puk pakhat, kum 80,000 liam ta vel aṭanga kum 500 liam ta vel thleng mihring chenna ṭhin nia an hriatah laihchhuah a nih thu a sawi.

An thil laih chhuah aṭang hian Africa hmun ṭhenkhatah chuan Middle Stone Age tawp lam aṭang khan inphum an hrat tawh niin mithiamte chuan rinna lian tak an nei nghal a ni. An ruhro laihchhuahna hmun hi Kenya-a tuipui kam aṭangin km 15 vela hlaa awm niin helai hmunah hian archeologist-te chu kum 2010 vel aṭang khan an chetla tawh a, kum 2013 vel aṭang tawh khan helai hmunah hian ruang phum a awm ngei tih chhinchhiahna an hmu ṭan tawh niin an sawi bawk.

An ruhro laihchhuah hi a ha vel aṭanga a lan dan chuan kum 2.5 -3 vel niin an ngai.