Amy Lee, Bring Me to Life leh a pasal

Evanescence frontwoman Amy Lee chuan an band lar chhuahna single 'Bring Me to Life' a phuah chhuah dan tunhnai khan a sawi chhuak a, tuna a pasal Josh Hartzler vanga a phuah a ni daih mai!

Sonic Seducer-in an interview-naah hemi chungchang hi sawi chhuakin he hla a phuah lai hian a pasal nen hian ngaihzawn pawh an la inngaihzawng lo hial a ni. "Ka pasal chungchang hi a ni a, mahse kan la inneih hma thil a ni," tia sawiin Amy Lynn Lee chuan,"Hun eng emaw lai a ni, inlaichinna duhawm lo tak ka hmachhawn lai leh hmun harsa taka ka awm lai a ni a, chutah chuan tuna ka pasal, Josh hi ka ṭhian satliah a la ni a, hriat pawh kan la inhre ṭha lutuk lo. Vawi thum emaw, vawi li emaw chuah kan la inhmu ang tihah hian kan ṭhiante'n pawna car an park laiin restaurant-ah kan ṭhu dun a ni. Chutah chuan min rawn en a,'Chuan, i hlim em?,' tiin min zawt a.

"Mak ka ti tak zet a, ka thinlung hi a chhun tlang zawkin ka hria, a chhan chu, ṭha leh nuam ti tak angin ka awm a, mahse, tu emaw chuan min hmu tlang thei a ni. Chuvang chu a nia, a chang khatnaah- 'How can you see into my eyes, like open doors' tia ka phuah. Hlaa a lo chang ta hi a ropui a, min pholang tu hla leh mi zawng zawngin min hriatna a ni ta hial," tiin a sawi.

Bring Me to Life hla hrim hrim hian chanchin a ngah khawp mai. A tirah chuan mipa part, a rap part kha phuah tel a ni lo. Mahse an label lamin mipa tel tura an nawr luih avangin 12 stones vocals Paul McCoy-a'n a pui a ni. Mipa zai tel tura an ti hi Amy Lee hian a tirah chuan a duh lo hle a, mahse a tawpah erawh a remti ta hram a, mahse an par chhuahna hla a ni ta hial thung.

Bring Me to Life lar ṭhin zia kha....
Bring Me to Life leh My Immortal vel lar vanglai tak tak ang kha chu Evanescence hian an tawng leh tawh lo ang tih a sawi ngam. Khatih hunlaia an band line-up kha Evanescence ṭhat lai ber pawh a ni ngei ang.

Bring Me to Life hi 2000s chhoah kha chuan khawvela hla lar ber zinga mi a ni a, ram panga vel laiah platinum emaw multi-platinum emaw a kai phak. Daredevil soundtrack-ah hman a ni zui bawk nen an hlawhtlinpui hle a ni.

Grammy-ah Best Rock Performance award an dawng phah bawk a, Evanescence sawi apianga mi tam tak rilrua rawn lang pawh Bring Me to Life hi a ni ngei ang.

Evanescence, hman leh tun
Evanescence band hi Amy Lee leh Ben Moody-te din niin an din aṭanga rei lo teah David Hodges-a'n a rawn zawm a, mahse an hlawhtling ṭan chauh tihah Moody leh Hodges-te hian band an chhuahsan ta mai a, tunah phei chuan anni pahnih hi chu an lar zui lo hle. Amy Lee hoin vawiin thleng hian an la kal ṭang ṭang a, Fallen album an tihchhuah ṭuma an band line-up-ah phei chuan amah Amy Lee chiah hi a tel tawh.

March 26 khan an studio album pangana The Bitter Truth an tlangzarh a, mahse hripui leng vangin thawm an nei zui thei meuh loa, nakkum lamah erawh Within Temptation nen Europe lam hrut kual an tum hle.