Bebe Rexha album thar Better Mistakes A ngaihthlak theih ta

'I'm a Mess' hitmaker Bebe Rexha chuan nimin khan a studio album pahnihna 'Better Mistakes' a tlangzarh a, streaming platform hrang hrangah ngaihthlak theihin a awm tawh a ni.

Bebe Rexha hian April 14 khan album thar 'Better Mistakes' a tlangzarh dawn tih hi a lo puangzar tawh a, album a tlangzarh hun tur a puan hnu lawk khan single thar 'Sabotage' pawh a tichhuak nghal a nih kha.

Rexha hian a album tharah hian mi hrang hrang- Travis Barker, Ty Dolla Sign, Trevor Daniel, Lil Uzi Vert, Doja Cat, Pink Sweats, Lunay leh Rick Ross-te a thawhpui a, hla 13 awmin heng zinga hla paruk hi amah a sak niin hla dang zawngah chuan thawhpui a nei a ni.

A album thara hla panga lai hi single-in a tichhuak tawh nghe nghe a, nikum October thlaa Doja Cat a thawhpuina 'Baby, I'm Jealous' a tihchhuah kha a album thar aṭanga a single tihchhuah hmasa ber a ni a, "Sacrifice', 'Sabotage', 'Die For a Man' leh 'Break My Heart Myself' te chu single-a a tihchhuah tawhte niin 'Break My Heart Myself' hi nimin khan album a tlangzarh rualin a tichhuak. 'Break My Heart Myself' hlaah hian Blink 182 drummer Travis Barker nen an thawkdun a, he hla hi chu hla hit tur tak chi niin a lang.

Kum 2018 khan Rexha hian a studio album hmasa ber 'Expectations' a tlangzarh a, a hlawhtlinpui nghal hle a, copy pawh a hralh hnem a, Recording Industry Association of America (RIAA) pawhin nikum October thla khan he album hi Platinum-ah a puang a ni. Tuna a album thar tlangzarh pawh hi a hlawhtlinpui leh hle ang tih a rinawm.

Kum 31 lai ni ve tawh American singer hian a album thar 'Better Mistakes' hi Warner Records kaltlangin a tlangzarh a ni.

Social media kaltlangin a album thar a chhuah tawh thu hi puangin, album thar a tlangzarh ruala a single thar 'Break My Heart Myself' a tihchhuah thu hi a sawi bakah album a tlangzarh hma ni khan ram hrang hranga a album thar chhuah hun tur a tarlang bawk. Album tracklisting phei hi chu kar hnih vel liam taah khan a lo tarlang daih tawh a ni.