Camila Cabello channa ‘Cinderella’ Amazon-ah tlangzarh dawn

Sony-in an siam Camila Cabello channa ‘Cinderella’ film chu theatre-ah tlangzarh a ni rih dawn lo a, kumin kum tawp lamah hian Amazon Prime Video lamah tihchhuah a ni zawk dawn.

Hripui len avanga tlang-zarh hun an sawn hlat tak 'Cinderella' film hi engtikah tak nge an tlangzarh dawn tih an la tichiang lo a, mahse theatre lamah ni loin streaming platform lamah an tlangzarh zawk dawn tih erawh hi chu a chiang tawh niin Variety chuan an tarlang.

Ruahmanna hmasaah chuan Sony hian kumin July thlaah theatre hrang hranga chhuah hman an tum a, mahse Covid-19 avangin tlangzarh hun hi an sawn hla ta a ni. Pitch Perfect franchise siamtu Kay Cannon chu director a ni a, Nicholas Galitzine chu Prince Robert lemah changin, Pierce Brosnan chu King Rowan lemah a chang thung a, Minnie Driver chu Queen Beatrice lemah a chang ve bawk.