PUBG Mobile India ramah a lo kir leh dawn e

India leh China inkara ramri chungchanga buaina a awm avanga nikum lama India sorkarin a khap tak, Players Unknown Battleground (PUBG) Mobile chu India rama khelh theih turin chhawp chhuah a ni leh dawn ta.

Amaherawhchu, PUBG Mobile tih a ni tawh dawn lo a, Battlegrounds Mobile India tih a ni thung dawn. He game India rama khelh theih tura chhawp chhuah a nih leh dawn thu hi sawi rik a nihna a rei leh tawh a, tunah erawh tihchian a ni ta. Krafton chuan he game hi India ramah a rawn let leh ṭep tawh tih sawi mah se a hun tur tak erawh chiang takin a la tarlang lo.

An website lama tarlan a nih dan chuan Battlegrounds Mobile India hi game dang ang bawkin tlangzarh a nih hmain pre-registration hun hawn a ni leh dawn. He game hi India ramah chiah khelh theih a ni dawn nia tarlan niin, in-game event ang chiahte chuan India lam kaihhnawih a awm ṭhin dawn a, hun rei lote hnuah he game chungchang hi chiang zawka tarlan a la ni leh dawn a ni.