Kurt Cobain thihna chungchang file FBI-in tlangzarh
Federal Bureau of Investigation (FBI) chuan Nirvana frontman Kurt Cobain thihna chungchang file phek 10-a chhah chu FBI Freedom of Information Act library 'The Vault'-ah a tlangzarh.
He file-ah hian kum 1994-a mahni intihluma ngaih Kurt Cobain-a thihdan, TV documentary leh media hrang hranga an tarlan dante sawilang tel chunga chhui nawn leh tura ngenna a tel. Ngenna thlentu hming erawh tihlan tel a ni lo.
Lehkha pakhatah chuan,"Rinsa ang ngeiin, mahni intihlum ni loa thah ngei ani tih finfiahna tam tak a awm," tih a inziak a, a dang lehah chuan,"Khawvel hmun hrang hranga fan maktaduai chuangin a thih dan chungchanga thu mumal tak awm lo chu tihchian an duh. United States-ah hetianga dik lohna a awm thei nia rinna awm thei hi a pawi hle a ni," tihte a inziak.
Rolling Stones-in a tarlan dan chuan FBI hian an file dahṭhat hi an tlangzarh ṭhin a, Cobain-a file pawh hi puangzar lawk loin website-ah thla hmasa khan an tlangzarh a ni.
FBI lam chhanletna
FBI hian zawhna an chhanletna pakhatah chuan,"Mr Cobain hi thah nia in ngaih avanga in rawn ngaihpawimawhna hi a lawmawm khawp mai. Mahse, tualthahna emaw thihna chungchang emaw chhuina hi a tlangpuiin state leh tualchhung thuneihna hnuaia awm a ni. Information in rawn dah tel behchhan hi chuan, FBI-te'n an chhuina aṭang erawh chuan federal law bawhchhiatna kan hmu thei lo a ni," an ti.
Cobain-a hun hnuhnung duhawm lo kha..
Kurt Cobain kha a nun hrim hrim kha a khawngaihthlak a, a hun tawp lam phei chu a ngaihnawm loh viau mai.
March 3, 1994 khan a nupui Courtney Love chuan champagne leh Rohypnol overdose-in a hmu a, ni nga lai damdawi-inah enkawl zui a ni.
March 18, 1994-ah chuan silai nen room-ah a inkalhhnan avangin Love chuan police a phone a ngai hial a, a chet buai chhoh avang hian March 30-ah phei chuan Los Angeles-a rehabilitation center-ah ama rem tihnain an dah lut ta hial.
Mahse a tukah rehabilitation center aṭangin a tlan chhuak a, Seattle lam a pan zui a, thlawhtheihnaah hian Guns N' Roses bassist Duff McKagan bulah a ṭhu nghe nghe. Duff hian Cobain chu hlim hmel hle mah se thil fel lo a awm nia a hriat thu a hnuah a sawi chhuak nghe nghe.
Hemi hnu hian a chhungte leh a ṭhiante chuan an zawng nasa hle a, April 3 vel thleng chuan Seattle-ah hmutu an la awm a, hemi hnu hian hmuh zui a ni ta lo. April 7-ah Nirvana an keh darh tih thu a thang a, a tuk April 8-ah chuan Lake Washington Boulevard-a a chenna in bula green house-ah a ruang hi an chhar ta a ni.
Cobain ruang hi hmuh a nih hian a beng aṭangin thi a chhuak a, shotgun-in a khabe a la in tin bawk. Report-ah chuan April 5, 1994 khan kum 27 mi nia thi nia tarlan a ni a, a taksa chu enfiah a nih hnuah diazepam leh heroin a awm tih hriat chhuah a ni bawk.
Sawi hlawh a thu hnutchhiah
Kurt Cobain hian thu hnut-chhiah a nei a, hei hi a naupan laia a ngaihtuahnaa a ṭhian (imaginary friend) Boddah tana a ziah niin, kum tam tak chhung chu music ngaihthlak emaw siam emaw chu a hlimpui tawh lo tihte pawh a ziak tel a ni.
"Ka mit hian ka chhungril lanchhuah tir thei se, ka nui hmel an hmuh hian mi zawng zawng an ṭap ang". - Kurt Cobain