Rock Am Ring 2022 : Lineup tur a hriat tawh

Kumtina neih ṭhin, rock music festival ropui Germany-a neih ṭhin Rock Am Ring and Rock Im Park 2022-a inlan turte chu puan chhuah a ni ta a, Green Day leh Volbeat-te chu headliner tur an ni.

Rock Am Ring and Rock Im Park 2022 hi nakkum June 3-5 chhung hian neih a ni dawn a, kumdang ang bawkin Rock Am Ring hi Nürburgring-ah neih a ni leh dawn a, Rock im Park pawh Zeppelinfeld-ah bawk neih a ni leh ang.

Nikum lamah khan he rock festival lian pahnih hi neih theih a ni tawh lo a, inlan tur puanchhuah vek a nih hnuah hripui leng vangin ṭhulh leh a ni. Kuminah pawh hian lineup puan a nih vek tawh hnuah ṭhulh a ni leh. Chumi a nih avang chuan nakkum lamah hian an nei thei a nih chuan kum hnih chhung lai an awl hnuah an nei leh thei dawn chauh tihna a ni dawn a, chhimtu pawh an tam hle ang tih a rinawm.

Rock music ngainatute'n an festival ngahhlut em em, rock star-te'n inlan an chakna ṭhin Rock Am Ring leh Rock Im Park 2020 ticket hi tunah hian an hralh ṭan der tawh a ni.

Band inlan tur zingah hian band lar tak tak- August Burns Red, Billy Talent, Black Veil Brides, Boston Manor, Bush, Daughtry, Ice Nine Kills, Korn, Of Mice and Men, Stick to Your Guns, The Distillers, The Offspring leh Weezer-te pawh an tel a, anni bakah hian band dang inlan tur eng maw zat an awm bawk.

Rock festival ropui chu
Rock Am Ring and Rock Im Park hi kum 1985 aṭanga neih ṭan tawh kha a ni. Germany-ah chuan music festival lian ber a ni a, khawvel huap pawha lian ber pawl a ni bawk. Kum 2007-ah phei kha chuan ticket zawng zawng an hralh zo vek a, festival pahnih belhkhawma chhimtu hi mi 1,50,000 an tling hial.

A tirah tak chuan Rock Am Ring festival chiah hi a awm a, vawi khat chiah neih tura an buatsaih a ni bawk. Mahse festival buatsaihtute rin phak bakin a hlawhtling a, mi 75,000 laiin an chhim tak avangin kumtin neih turin ruahmanna an siam zui a ni.

Rock Im Park hi chu kum 1993 aṭang khan neih ṭan a ni chauh thung.

Rock Am Ring and Rock Im Park hnuhnung ber, kum 2019-a neihah khan Tool, Slipknot, Die Ärzte, leh Slayer-te chu headliner an ni a, artist 77 lai inlanin heng zinga 36 lai mai hi rock band an ni.