Mystical Mizoram Ṭhazual Lengzem : Lunglawm tikimtu Siampuii Ralte pakhatna a ni

Mystical Mizoram Ṭhazual Lengzem chart chu Sihphir tleirawl Siampuii Ralte-in a thunun a, a hla hit 'Lunglawm Tikimtu' hmangin chart topper a ni.

Siampuii Ralte leh ‘Lunglawm Tikimtu’
Tunlaia Mizo lengzem singer lar ber pawl Siampuii Ralte hian 'Lunglawm Tikimtu' hi kumin kum tirah khan a tichhuak a, Zofate rilrem zawng tak a ni bawk a, mawi titu pawh an tam nghal hle.

Tunah hian YouTube-ah vawi nuai li chuang stream a ni tawh a, nuai nga a tling ṭep tawh hial. Asanga hla phuah 'Lunglawm Tikimtu' hi hla ngaihthlak hahdam tak a ni a, kumin chhunga Mizo lengzem hla lar ber pawl a ni thei pawh hi a mak lo. Music Video a hmuhnawm bakah Siampuii zai hmel hmuh a nuam bawk nen chart topper a ni pawh hi a mak lo.

Anthony WoWv leh Ceea Varte-te kut chhuak video hmuhnawm tak leh a hla hi a inrem a, chart lehah pakhatna a la ni thei dawn em tih chu hriat a chakawm tawh hle.

Siampuii x 2
Chart-ah hian Siampuii hming hi hmun dangah hmuh tur a awm bawk. Jt Production-a hla amah Jt-a nena an sak dun 'Ka Hmangaih te' chu tunah hian chart-ah parukna a ni mek bawk.

Pahnihna Jenny, Pathumna Grace 10:45
Chart-a pahnihna ni mek Jenny Jathang 'Kaltir Rawh le' pawh hi tunlai lengzem hla ngaihthlak hlawh pawl tak a ni. YouTube lamah thlirtu a ngah a, pakhatna la ni mai tur pawhin a dinhmun a ṭha hle.

Pathumna chu Grace 10:45-i hla 'class' tak mai 'Kumtluangin' kha a ni bawk. He hla hi a mawi a, chart hmasaah khan palina niin tunah erawh top 3-ah a rawn inhlangkai ta a ni.

Chart-a che ṭha zualte chu
Manuna 'Ṭha Sensiar' chu palina a ni a, Mathlenga 'Ka Duhaisam' chu pangana niin top 5 khartu a ni thung.

Essy, HT Lalthanzami, Jaui leh Lalduhawmi te pawh chart-ah hian an lang bawk a ni.