Joss khan ka career chungchangah min vau - Gal Gadot

Wonder Woman actress Gal Gadot chuan tunhnai khan interview-naah kum 2017-a tlangzarh tak Justice League an shoot ṭhat leh lai khan director Joss Whedon khan a career chungchangah a vau tih a sawi.

Israel N12 News-in an kawmnaah hemi chungchang hi sawi chhuakin,"Joss khan ka career chungchangah mi vauin eng emaw ka ti a nih chuan, ka career hi duhawm lo takah chhuah a tum a ni. Mahse a hunlai khan ka chingfel nghal a ni," a ti.

Zack Snyder-a'n a fanu thihna avanga Justice League a chhuahsan hnuah khan Joss Whedon hian a rawn thlak a, scene ṭhenkhat, Joss ho hian an chang ṭha leh a ni. Hemi chungchangah hian Whedon hian sawi zui a hlawh a, Gadot pawh hian a hmain hemi chungchang hi lo sawi chhuak zeuh tawhin,"Joss-a nena kan inkar kha a ṭha ber chu a ni hauh lo, mahse ka chingfel nghal a," tiin a hma pawhin a lo sawi tawh.

Justice League a direct chungchangah hian Whedon hian chanchin duhawm lo tak tak a hnutchhiah nual. Cyborg lema chang Ray Fisher pawhin a lo hek tawh a, nasa takin Warner Bros. lam pawh a lo sawisel tawh a nih kha. Hemi chungchang hi WarnerMedia pawhin thuchhuah siam tawhin Fisher-a thusawi chung-chang chu an chhui zui tawh a, hremna pawh lek kawh a ni tawh tiin an lo sawi tawh. Mahse eng hremna tak nge an lek kawh tih erawh an sawi lang lo.