Brit Awards-ah Taylor Swift-in Global Icon Award a dawng dawn

American singer lar Taylor Swift chu 2021 Brit Awards, vawiina sem turah Global Icon Award hlan a ni dawn.

Taylor Swift hi mibik, midangin an la tawn ngai loh tawngtu a ni fo tawh. Tun ṭumah pawh hian mibik a nihzia hriat nawntirin kan awm leh ta a ni. Hmeichhe artist zinga he chawimawina dawng hmasa ber tur a ni a, English artist ni lo zinga he chawimawina dawng hmasa ber tur a ni bawk.

British hoin an ngaih hlut em em Brit Awards semnaah hian Global Icon Award dawng thei hi mi pathum an awm tawh a, chung mite chu legend ṭhiau an ni. Elton John (2014), David Bowie (2016) leh Robbie Williams (2017)-te chu hetiang chawimawina lo dawng tawhte an ni a, anni huangah hian Taylor Swift hi a awm ve dawn ta.

Khawvel hmun hrang hrangah huhang a ngahzia chu sawi nawn ngai a ni tawh lo a, chung avangte leh a hlawhtlinna hrang hrangte avangin he chawimawina hi a dawng dawn a ni.

2021 Brit Awards-ah hian Swift hian award pahnih a dawng thut thei. International female solo artist category-ah nomination a hmu bawk a, he huangah hian kum 2015-ah pawh khan award a lo dawng tawh. Kuminah hian Ariana Grande, Billie Eilish, Cardi B leh Miley Cyrus-te nen huang khatah an awm a, he huanga a awmpuite hi he chawimawina dawng phu ṭhiau erawh an ni thung.

Swift hian Brit Awards-ah hian International female solo artist award kum 2015-a a dawn bak hi a la dawng lo thung a, UK chart lamah erawh record hrang hrang siam tawhin, kum zabi 21 chhunga UK Album chart-a studio album pasarih lai topper nihpui thei awmchhun a ni.

2021 Brit Awards hi comedian Jack Whitehall chuan a host dawn a, The O2-ah semna ceremony hi an nei ang.