Sonic 2’ Crew Member hnenah Jim Carrey-a'n car a pe

Canadian-American actor leh comedian lar Jim Carrey chuan tuna production an kalpui mek 'Sonic the Hedgehog 2' crew member pakhat hnenah lawmthu sawina atan car a pe mauh mai.

Jim Carrey hi tunah hian Vancouver, Canada-ah Sonic 2 shoot hian a awm mek a, he film siama rim taka thawktute hnena lawmthu sawina turin ṭhum a vawr a, chu a ṭhum vawra vannei ber hnenah chuan Chevy Blazer RS a pe ta a ni. He a car pek hi $40,000 man vel niin Variety chuan a tarlang.

Toronto khaw chhuak Carrey hi Sonic 2-ah hian misual Dr. Robotnik lemah a chang leh dawn a, hei hi a film hmasaa a role tho kha niin, kan hmuh hnuhnun ber kha chuan khawvel aṭanga paih chhuah a ni a, part 2-ah hian phuba a rawn lak ngei a rinawm.

'Sonic the Hedgehog' hi saga classic game behchhana film-a siam a ni a, nikum hri len nasat tak tak hma, February thlaa tlangzarh kha niin a hlawhtling hle a, Box Office aṭangin $maktaduai 300 chuang sum a lalut tawh a ni.