NBC-in nakkum Golden Globes pe chhuak dawn lo!

Kum 1996 aṭanga kum tina Golden Globes awards ceremony en theihna tura pe chhuak ṭhintu US cable network NBC chuan Hollywood Foreign Press Association (HFPA)-ah mihang an awm loh vangin nakkumah an pe chhuak dawn lo.

Golden Globes awards semtu HFPA hian nakkum lamah engtin nge award an kalpui dawn an la tarlang lo a ni.

Tunhnaiah HFPA hian sawisel an tawk nasa hle a, February-a Los Angeles Times-a report tihchhuah a nih hnuah khan an che buai chho hle. Member 87 lai awm mah se an zingah mihang an awm loh avangin sawisel an hlawh a, hemi avang hian an pawl chuan insiamṭhat pawh an tum thu an lo sawi chhuak tawh hial bawk.

Film lama chawimawina ngaih hlut dan indawtah chuan Oscar tih lohah chuan Golden Globes hi ngaihhlut hlawh ber a ni a, he award buaipuitu HFPA-ah hian kum 20 chhung chu mihang an awm tawh lo nia tarlan niin, hei vang hian sawisel pawh an tawk nasa hle.

NBC chuan thuchhuah an siamah HFPA chu a ṭha zawnga an insiam ṭhat ngei pawh an ring tih tarlangin nakkum Golden Globes erawh pek chhuah a ni dawn lo tih an tarlang tel thung a, kum 2023-ah erawh pe chhuak leh thei dinhmuna an din thu pawh an tarlang tel a ni.

Insiam ṭhat erawh an tum
HFPA hian an kalphung chu siam ṭhat ngei erawh an tum tih an tarlang a, tuna an member zat 87 ni mek chu 100-a tihpun an tum tih sawiin mihang 13 tal an telh belh dawn tih an sawi.

Hollywood star lam thu leh hla
Tom Cruise chuan Golden Globes award pathum a lo dawn tawh chu a pe let leh dawn. HFPA-ah mi hrang hrang an inpawlh tawk lo nia sawiselna awm mek chu Tom Cruise pawh hian thlawpin Jerry Maguire leh Born on the Fourth of July avanga chawimawina a lo dawn tawhte chu a pe let leh dawn a ni.

Avengers star Mark Ruffalo leh Scarlett Johansson-te pawh lo ṭawng chhuak tawhin, insiam ṭhat tur thu sawi ringawt chu a ṭha tawk lo niin an lo sawi tawh.

WarnerMedia, Netflix leh Amazon Studio-te pawh an ngawi hle hle bik lo a, HFPA kaihhnawih thil tihnaah an tel tawh dawn lo tih an lo sawi ve tawh bawk a ni.