BRIT Award 2021 : DUALipa-i'n Award pahnih a dawng

Brit Awards 2021 chu nizan hmasa khan sem a ni a, British singer chhelo Dua Lipa chuan award pahnih lai a dawng a, award dawng hnem ber a ni.

Coldplay chuan tunhnaia an single tihchhuah thar Higher Power’ hmangin show an hawng a, a tana zan ropuiah hian Dua Lipa chuan a album 'Future Nostalgia'-a hla panga medley-in, US singer khawvelin a atchilh rawn mek Olivia Rodrigo pawhin a hla hit Drivers License a sa a, a sa thiamin lawm a hlawh hle. Arlo Parks, Years & Years ft Elton John, The Weeknd leh Griff-te an perform bakah Headie One, AJ Tracey leh Young T & Bugsey-te chu an perform ho a, Rag'n'Bone Man, Pink, Lewisham leh Greenwich NHS Choir-te chuan 'Anywhere Away from Here' an sa ho bawk.

Dua Lipa ropui zan
Brit Awards 2021-a award pakhat aia dawng thei awmchhun chu 'Dont Start Now' hitmaker Dua Lipa a ni a, British Album of the Year leh British Female Solo Artist award-te a dawng.

Award a dawn paha a thusawiah Dua Lipa chuan British prime minister Boris Johnson chu NHS worker-te hlawh tisang turin a ngen nghal bawk. Dua Lipa hian nikum kumtir lama a tlangzarh 'Future Nostalgia' hmangin Album of the Year award a dawng a ni.

Award dawngtu dangte chu...
Nomination hmu tam ber zinga mi Arlo Parks chuan Breakthrough Artist award a dawng. One Direction aṭanga khawvelin a hriat Harry Styles chuan a single 'Watermelon Sugar' chu British Single award a dawnpui. Harry hian One Direction kehdarh hnua a Brit award hmasa ber a dawng a ni.

British Male Solo Artist dawngtu chu J Hus a ni a, British Group award chu Little Mix-in dawngin International Male Solo Artist-ah the Weeknd thlan a ni thung a, Billie Eilish chuan International Female Solo Artist award a dawng bawk.

International Group award chu Haim-in dawngin Hail hi BTS, Fontaines D.C.. Foo Fighters leh Run the Jewels-te'n an tluk zo lo a ni. Rising Star Award chu Griff in a dawng thung.

Puanzar lawk angin Taylor Swift chuan Global Icon Award a dawng a, a show hmuhnawm tih Game of Thrones star Maisie Williams-in award hi a hlan a ni.

Brit Awards hi
O2 Arena-ah neih niin English Comedian Jack Whitehall chuan a host a, a zawnin kum li a host-na chiah a ni tawh. Award semna ceremony hi February-a neih tura ruahman kha a ni a, mahse Covid-19 hripui leng vangin nizan hmasa (An ram huna May 11) khan an sem ta a ni.

Brit Awards hmasa ber chu kum 1977 khan sem a ni a, chutih hunlai chuan The British Record Industry Britannia Awards tih a ni ṭhin. Kum 1982 aṭang khan kumtin sem ṭhin niin kum 1989 aṭang khan Brit Awards tiin a hming an thlak chauh thung.