Billboard Music Awards-a Artist of the Decade award dawng tur Drake

'God's Plan' hitmaker Drake chu May 23-a sem tur 2021 Billboard Music Awards-ah Artist of the Decade award hlan a ni dawn.

Drake hian Eminem leh Mariah Carey-te hnungzuiin Billboard Music Awards-a chawimawina ngaihhlut hi a dawng dawn a ni. Kum 2009 leh 2019 inkarah khan Billboard album chart-a topper ni thei album pakua lai a nei a, Billboard Hot 100-a top 10 single nei tam ber niin hla 33 lai he chart top 10-ah hian a lanpui.

Artist of the Decade chawimawina dawng thei zingah hian Taylor Swift, Bruno Mars, Rihanna, leh Adele-te pawh an tel a, Billboard consumption data hmanga dawng tur hi thlan chhuah niin Drake hian a dawng dawn ta a ni.

Drake hi Billboard Music Awards history-a award dawng hnem ber zingah a tel tawh sa hrim hrim a, award 27 lai a dawn tawh bakah kuminah hian nomination pasarih a hmu leh bawk.

Kumin Billboard Awards-ah hian Pink chuan Icon Award a dawng dawn bawk a, Nick Jonas chu host tur a ni thung. Pink hi a perform dawn bawk a, ani bakah hian The Weeknd leh BTS-te pawh an perform dawn a ni.