Ellen DeGeneres-in a talk show a titawp dawn

Khawvela talk show lar ber zinga mi 'The Ellen DeGeneres Show' chu 2021-22 season zawhah tihtawp a ni tawh dawn.

The Ellen DeGeneres Show hi kum 2003 aṭang khan Ellen DeGeneres hian a kalpui ṭan a, September 8, 2003 khan pek chhuah hmasak ber niin kum 19 hnuah tihtawp a ni dawn ta tih Ellen chuan a sawi. Tunah hian Season 18 siam tawh niin episode 3,051 a awm tawh.

DeGeneres chuan Hollywood Reporter hnenah,"Season 16-na zawhah kha chuan tihtawp ka lo tum tawh a, mahse kum li dang pawtsei leh tura min ngenna avangin ka pawtsei leh ta a ni," tia sawiin tunah chuan a show chu tihtawp a tum ta tak tak a ni.

Hollywood Reporter-in an tarlan dan chuan Kum 63 lai ni ve tawh DeGeneres hian Thawhlehni khan show tihtawp a tum chungchanga a thutlukna hi a staff-te chu a hrilh tawh. A show hian Daytime Emmy awards 60 chuang a dawng tawh nghe nghe.

"Kum hnih liam taah khan kum thum chhung atan inremna kan ziah belh leh a, ka thinlungah hian Season 19 chu a tawpna tur ani tih ka hre reng ṭhin.

"Kum 18 liam ta khan ka nun a thlak- in zavaiin ka nun in thlak a ni. Show in lo en a, in lo nuih a, in lo lam a, a changa in lo ṭah avang khan lawmthu ka sawi. He show hi ka nuna ka thil tawn ropui ber zinga mi a ni," tiin Ellen chuan a sawi.

US-ah chuan mi tam tak nuna bet tawh show nia sawi ngam ni tawh mah se BBC-in a tarlan dan chuan tunhnaiah show rating a tlahniam ve nasa hle a ni.