Gal Gadot-i'n Israel thlavang a hauh em ni?

Israel leh Palestine inkara buaina chhuak mek chungchanga a thu post avangin Wonder Woman star Gal Gadot chuan sawisel a hlawh nasa a, a post comment a off phah hial!

Gadot hian Nilaini khan Twitter-ah,"Kan ramin indona a hmachhawn mek. Ka rilru a na tak zet," tia tweet siamin,"Ka chhungte, ka ṭhiante ka ngaihtuah hle mai.. Ka mite ka ngaihtuah hle bawk. He thil hi hun rei tak ata tawha chhiatna thleng nawn fo a ni. Israel hian ram zalen leh him a phu. Kan ṭhenawm ramte pawhin chutiang bawk chu an phu a ni. Harsatna tuarte leh an chhungte tan ka ṭawngṭai a, hetiang buaina hi a tawp theihna turin ka ṭawngṭai bawk a, kan hruaitute'n lehlam lehlama buaina an chinfel theihna atan ka ṭawngṭai bawk. Ni duhawm zawk a lo awm theihna atan ka ṭawngṭai a ni," a ti.

He a post hian sawi zui a hlawh nghal hle a, Palestine ti loa 'Ṭhenawm' tia ṭawngkam a hmangte leh Israel-in Palestine a beih laia Israel thlawp zawnga post a siam nia ngaia sawiseltu an tam hle a ni. Ṭhenkhat phei chuan a Wonder Woman role thlengin beihna atan an hmang zui.

Gal Gadot hi an ramin a phut angin Israel Defense Force-a kum hnih lai sipaia lo ṭang tawh a ni bawk nen, hengte thleng thleng hian ṭhenkhat chuan an sawi zui a ni.

Hetihlai hian ṭhenkhat erawh chuan a thlavang an hauh ve thung a, a thlavang hauhtu zingah hian Republican Texas Senator Ted Cruz pawh a tel niin Deadline chuan a tarlang.