Billboard Album chart-ah DJ Khaled 'Khaled Khaled' pakhatna a ni
Billboard 200 chart-ah DJ Khaled album thar 'Khaled Khaled' chu pakhatna a ni a, The Hot 100 chart-ah erawh kar hmasa lam nena khaikhinin thil danglam a thleng tam lem lo.
Billboard 200 chart
Khaled Khaled hi DJ Khaled-a studio album 12-na a ni tawh a, April 30 khan We the Best Music, Roc Nation leh Epic Records kaltlangin a tlangzarh a ni.
He album-ah hian milar hrang hrang a thawhpui nasa a, chumi a nih avang chuan chart topper a ni pawh hi a mak lo hle. A thawhpuite chu- Lil Wayne, Jeremih, Lil Baby, Lil Durk, Cardi B, H.E.R., Migos, Post Malone, Megan Thee Stallion, DaBaby, Justin Bieber, 21 Savage, Bryson Tiller, Roddy Ricch, Drake, A Boogie wit da Hoodie, Big Sean, Rick Ross, Puff Daddy, Nas, Jay-Z, James Fauntleroy, Justin Timberlake, Meek Mill, Buju Banton, Capleton, Bounty Killer, leh Barrington Levy-te an ni a, an hming en ringawt pawh hian track 13 awmna album hian pakhatna nih hi a phu hliah hliah tiin sawi ila kan sawi sualin a rinawm loh.
Pahnihna chu kar hmasaa pakhatna Moneybagg Yo album 'A Gangsta's Pain' kha a ni thung a, Morgan Wallen-a album 'Dangerous: The Double Album' chu pathumna a ni bawk. Justin Bieber-a album 'Justice' pawh palina a la ni pha a ni.
Artist 100-ah pawh Khaled bawk
Artist 100 chart-ah pawh DJ Khaled hi pakhatna a ni a, kar hmasaa pathumna The Weeknd chu pahnihna ni thungin Billie Eilish chu 12 aṭangin pathumnaah a rawn invawrh ve bawk. Moneybagg Yo chu palina a ni a, Justin Bieber chu pangana a ni.
The Hot 100 a danglam lo
Billboard Hot 100 chart-ah chuan kar hmasaa pakhatna The Weeknd & Ariana Grande 'Save Your Tears' bawk pakhatna a ni leh. Top 3-a langte chu kar hmasaa an indawt dan bawka intlar thla lehin Silk Sonic (Bruno Mars & Anderson .Paak) 'Leave The Door Open' chu pahihna a ni leh a, Justin Bieber-te hla 'Peaches' chu pathumna a ni leh bawk.
Dua Lipa ft DaBabay 'Levitating' chu pangana aṭangin palinaah a rawn insawn a, kar hmasaa pangana Doja Cat Featuring SZA 'Kiss Me More' chu pangana a ni ve thung.