Friends: The Reunion The One Where They Get Back Together Chhuah hun tur a hriat ta

Friends fan-te tan thu lawmawm tak mai hriat tur a awm ta! Friends: The Reunion chu May 27 hian HBO Max-ah en theihin a awm tawh dawn tih streaming service chuan an puang chiang ta a.

Kum tam tak chhung lo tihhlim tawh ṭhintu Sitcom Friends reunion show neih hun tur an hre tawh miau a, tunah chuan awm mai mai har an ti tawh khawp ang. Nikum lama an lo nghahfak tawh, hripui leng avanga an nghah chhuah theih lawk tak loh Friends: The Reunion chu tun thla tawpah hian Friends fan-te chuan an en thei dawn ta a ni.

Nimin piah lamah khan second 40 leka rei teaser an tichhuak a, chutah chuan Jennifer Aniston, Courteney Cox, Lisa Kudrow, Matt LeBlanc, Matthew Perry, leh David Schwimmer-te camera hnung chhawn zawnga an kal lai hmuh tur a awm. Friends fan-te an phawklek a, social media lamah pawh an post hmuh tur a tam hle.

HBO Max hi keini ram lamah la hman ve theih loh mah se en theih dan kawng erawh a awm leh mai a rinawm. HBO Max lam hian US ni lo ram dang emaw, platform dang emaw an tlangzarh hun tur an la puang lo a ni. 90's-a sitcom lar ber zinga mi, kum 2004-a tihtawp tak Friends reunion show-ah hian a main cast-te kan hmu leh vek dawn a, anni bakah hian special guest 'special' tak tak an inlan dawn!

Tute maw inlan dawn?
David Beckham, Justin Bieber, BTS, James Corden, Cindy Crawford, Cara Delevingne, Lady Gaga, Elliott Gould, Kit Harington, Larry Hankin, Mindy Kaling, Thomas Lennon, Christina Pickles, Tom Selleck, James Michael Tyler, Maggie Wheeler, Reese Witherspoon, leh Malala Yousafzai-te an inlan dawn.

Engtiangin nge heng mite hi an inlan dawn hriat a la ni loa, mahse hre turin nghah rei pawh a ngai vak tawh dawn lo hi a lawmawm lai chu a ni.

Reunion show hi...
November 12, 2019-ah daih tawh khan The Hollywood Reporter chuan Warner Bros TV-in HBO Max-a pek chhuah turin Friends reunion an siam dawn tih an tarlang a, a main cast-te chu an inlan leh vek dawn tih an tarlang bawk.

Hripui leng vanga khawvel a buai hma lawk, nikum February thlaah khan HBO lam chuan Friends: The Reunion an siam dawn tih hi an tichiang a, March thlaah production an ṭan dawn tih thlengin an tarlang hman. Mahse, hripuiin khawvel a tibuai a, tun thla tawp lamah kan en thei dawn chauh ta a ni.