Maruati'n hla thar a tichhuak dawn

'Mawi Tawp Berin' tih hla hmanga thiam taka Zofate min awitu Maruati chuan hla thar 'Lo Kir Rawh' a tichhuak dawn a, zanin hian Zonet lamah ngaihthlak theihin a awm ang.

He hla hi Vanromawia (Tetea), Kulikawn Presbyterian Kohhran Upa phuah niin Maruati hian Instagram lamah pawh a teaser a tichhuak tawh nghe nghe a, a sa mawi lehpek dawn hle tih a teaser tawite aṭang pawhin a hriat theih a ni.

Hla phuahtu Vanromawia chuan, "Kum 2010 kumtawp lam kha a ni tawh. Khatih hunlaia ka thinlunga lo lian em em chu, sual hrang hrang hliama awm mek leh boralna kawng zawh mek mi tam tak an awm si a. Pathian ṭhahnemngaihna chuan chung mite chu a hnena kir leh turin a sawm si. Chu thu chu ka thinlungah a lo lian em em a, hla thuah Pathian khawngaihna avangin ka ziak chhuak ta a ni ber mai," tiin a hla phuah chungchang Vanglaini a hrilh.

"Sual setana'n a hliam tawh te, a sal beh mekte hnenah Pathianin a kianga kir leh tura a sawmna lam hawi hla a ni," tiin a sawi bawk.

Maruati hian a sa thiam leh hle ang tih a rinawm a, hla thar a tihchhuah tur nghakhlel fe fe pawh an tam ngei ang. Zonet lama tihchhuah a nih aṭanga kar khat hnu velah YouTube lamah duh hun huna ngaihthlak theihin a awm leh dawn a ni.