Phil Wickham single thar 'It’s Always Been You' a chhuak

Worship Artist Phil Wickham chuan Zirtawpni khan music video thar 'It’s Always Been You' a tichhuak.

He hla hi Wickham hian a hla phuah leh record tawh zingah chuan a duh ber pawl a nih thu sawiin, danglam tak maia a nun khawihtu a nih thu a sawi bawk. Streaming platform hrang hrangah ngaihthlak theihin a awm tawh a ni.

'Living Hope' hitmaker Phil Wickham chuan hla thar a tihchhuah ni khan social media lamah a hla thar chungchanga a rilrua awmte sawi chhuakin,"He hla ka ṭhian ṭha tak tak Ricky leh Ran Jackson-te nena kan phuah ni kha ka theihngilh tawh ngai lo ang.......He hlain ka nuna Pathian ṭhatna leh rinawmzia min hriatchhuahtir nasat avangin ka mittui ka dang zo lo. Pathianin he hla hi engtin nge a hman dawn tih ka la hre lo a, mahse tu emaw hnenah mal takin a awm lo a ni tih hriat chhuahtirna atan a hman theihna tur erawh chuan ka dil a ni. Khawiah pawh awm la, engpawh tawk la, Pathian i hnenah a awm a ni," a ti.

June 25 hian a studio album pariatna tur 'Hymn Of Heaven' a tichhuak dawn a, hla 13 a awm dawn a ni.

Phil Wickham-a hlate hi Pathianin a hmang hle a, kum 2018-a a tihchhuah 'Living Hope' phei chu RIAA Gold-certify hial niin GMA Dove Award-ah pawh “Worship Recorded Song of the Year”-ah thlan a ni hial bawk. 'This is Amazing Grace' pawh kha RIAA Platinum a kai pha bawk a ni. A album tihchhuah thar turah pawh hian Pathian fakna hla ṭha tak tak a awm leh ngei ang tih a rinawm.