Newsboys-in Capitol CMG kaltlangin album thar an buaipui

'God's Not Dead' hitmaker, Christian rock band Newsboys chuan Kristian artist lar tak tak lo thawhpui tawh ṭhintu Capitol Christian Music Group (Capitol CMG) hnuaiah album thar an tichhuak dawn.

Capitol CMG Co-President- Hudson Plachy leh Brad O’Donnell-te chuan Newsboys an thawhpui thei chu lawmawm an tih thu sawiin hunkal tawhah pawh thawhdunna ṭha tak tak kan lo nei tawh ṭhin a, tuna kan thawkdun leh ta hi a lawmawm hle a ni, an ti.

Newsboys manager Wesley Campbell pawhin Capitol CMG an thawhpui leh ta chu lawmawm a ti hle tih sawi ve bawkin an phur tawh hle a, an thawhdunna rah chu khawvel hriat tura pho chhuah hlan an ngahhlelh tawh thu a sawi ve bawk.

Capitol CMG hi khawvela Gospel singer lar ber ber- Chris Tomlin, TobyMac, Amy Grant leh Michael W. Smith-te pawhin an thawhpui tawh a ni.

Newsboys hi kum 1985-a indin daih tawh kha niin tuna an vocalist ni mek Michael Tait hi DC Talk aṭanga khawvelin a lo hmelhriat tawh kha a ni. Studio album 19 lai tichhuak tawhin Michael Tait-a'n an band a zawm hnuah hian album paruk an tichhuak tawh bawk.