Miss Universe 2020 : Miss Mexico Andrea Meza

Khawvelin Miss Universe thar a nei a, chu chu Miss Mexico Andrea Meza niin, Miss Universe 2019 Zozibini Tunzi, South Africa chuan nimin zing khan Miss Universe crown a khumtir.

Covid-19 hripui leng avangin nikum lamah Miss Universe thlan theih a ni loa, chumi avang chuan nimin zingkarah khan Seminole Hard Rock Hotel & Casino, Hollywood, Florida, United States-ah Miss Universe 2020 thlanna hi an nei a; Miss Mexico Andrea Meza chu Miss Universe 2020 atana thlan niin, Miss Brazil Julia Gama 1st Runner-Up a ni a, Miss Peru Janick Maceta chu 2nd Runner-Up a ni thung. India ram aiawhtu Adline Castelino chu 3rd Runner-up a ni ve bawk.

Andrea Meza chu...
Miss Universe 2020 intihsiaknaah hian ram 74 lai an tel a, chung zinga che ṭha ber, Miss Universe crown khumtu Miss Mexico Andrea Meza hi a hmingpum chu Alma Andrea Meza Carmona niin, kum 26 mi a ni.

Mexican hmeichhe zinga Miss Universe crown khum thei pathumna a ni a, Mexicana Universal 2020 leh Miss Mexico 2017 ni tawh bawkin Miss World 2017-ah khan 1st Runner-Up a ni bawk. Model a nih piah lamah Autonomous University of Chihuahua aṭangin kum 2017 khan software engineering-ah degree a nei a ni.

Miss Universe 2020 hi
Miss Universe intihsiak vawi 69-na a ni a, contestant 74 an awm. American actor leh radio host Mario Lopez leh Miss Universe 2012, Miss USA lo ni tawh bawk Olivia Culpo-te chuan an host a ni.

Nikum lamah hripui a len nasat avangin kumin hian Miss Universe 2020 hi thlan theih a ni chauh a, calendar kum ni loa Miss Universe thlan a nih ṭum thumna a ni bawk. Puerto Rican singer Luis Fonsi chu kumina performer a ni.

Special Award dawngtute
Miss Myanmar Thuzar Wint Lwin chuan Best National Costume award a dawng a, Bolivia aiawhtu Lenka Nemer chuan Social Impact Award dawng bawkin Dominican Republic aiawhtu Kimberly Jiménez chuan Carnival Spirit Award a dawng bawk.

Ngaihven hlawh Thuzar Wint Lwin
Tun Miss Universe contest-ah hian Miss Myanmar Thuzar Wint Lwin hi sawi hmaih thian a ni lo ang. National Costume intihsiakah a thawmhnaw hak tur kalkawnga a bo avangin thawmhnaw dang a inlbel ta niin host-te chuan an sawi a, chutah 'Pray for Myanmar' tih thuziak a rawn keng lang bawk nen khawvelin a ngaihven zui hle. Heta a thawmhnaw inbel hi 'Lai' thuam a ni.

An ram Sipaiin an awp beh mek dodal zawngin Pathianni khan video kaltlangin thu a sawi bawk a,"Kan mite chu nitinin an thi a, sipaiin nitinin mi an kap hlum a ni. Myanmar chungchang sawi chhuak turin mi zawng zawng ka sawm. Rorelna chhuhsak a nih aṭanga Miss Universe Myanmar ka nih angin, ka theih anga tam keipawhin ka sawi chhuak tawh a ni," a ti.