MTV Movie & TV Awards 2021 : WandaVision a che ṭha

MTV Movie & TV Awards 2021 leh MTV Movie & TV Awards: Unscripted chu Hollywood Palladium theatre, California-ah Pathianni leh Thawhṭanni khan sem a ni a, MTV Movie & TV Awards 2021-ah chuan WandaVision a che ṭha hle a, award pali a la.

MTV Movie & TV Awards: Unscripted-ah RuPaul's Drag Race che ṭha thungin award pathum a la a ni.

Marvel che ṭhatna MTV Movie & TV Awards 2021
Elizabeth Olsen leh Paul Bettany-te channa WandaVision chuan award a dawng hnem ber a, award ngaihhlut tak tak a dawng nual.

Best Show award a dawn bakah a changtunu Elizabeth Olsen chuan Best Performance in a Show a dawng a, Kathryn Hahn chuan Best Villain dawng bawkin Wanda vs. Agatha chu Best Fight-ah thlan a ni bawk. Marvel series tho The Falcon and the Winter Soldier pawhin Best Hero award a dawn bakah Falcon (Anthony Mackie) leh Winter Soldier (Sebastian Stan)-te chu Best Duo-ah thlan an ni.

Award ngaihhlut Best Movie dawngtu chu To All the Boys: Always and Forever a ni a, Outer Banks-a changtu Chase Stokes leh Madelyn Cline-te chuan Best Kiss award an dawng thung.

MTV Movie & TV Awards: Unscripted lam ve thung
MTV Movie & TV Awards: Unscripted award hi Thawhṭanni khan sem niin vawi khat an semna chauh a la ni a, reality television show lama che ṭhate chawimawina niin RuPaul's Drag Race chuan award a dawng hnem ber a, pathum a dawng.

BTS: Break the Silence: The Movie chu Best Music Documentary-ah thlan a ni a, Best Docu-Reality Show-ah Jersey Shore Family Vacation chu thlan a ni.

Chawimawina bik dawngtute
English Comedian lar, Borat actor Sacha Baron Cohen chu Comedic Genius Award hlan a ni a, Black Widow actress Scarlett Johansson chu MTV Generation Award hlan niin, MTV Reality Royalty Lifetime Achievement dawngtu chu Jersey Shore: Family Vacation a ni bawk.