Box Office-ah Spiral-in ro a rel

North America Box Office-ah chuan Chris Rock channa Spiral-in sum a lalut tam ber a, kar hmasa lama pakhatna Wrath of Man chu pahnihna niin film tlangzarh thar Those Who Wish Me Dead chu pathumna a ni.

Sum lalut tam ber Spiral
Zirtawpni liam taa US-a tlangzarh Spiral chuan tun kar tawp liam taah khan North America Box Office a thunun a, sum lalut tam ber niin, theatre 2,811 aṭangin $8,750,034 a lalut.

Spiral hi horror film a ni a, Saw film series pakuana niin Chris Rock, Max Minghella, Marisol Nichols, leh Samuel L. Jackson-te an chang a ni. Nikum May a tlangzarh tura an ruahman tawh kha ni mah se hripui leng vangin kar tawp liam taah khan an tlangzarh chauh a, Box Office-ah che ṭha nghal viau mah se a sum lakluh erawh tam lua chu a ni lo.

Critics lamin an fak em em loa, Rotten Tomatoes-ah pawh rating a hmu sang lutuk lo a ni.

Film thar dangte chu
Angelina Jolie channa Those Who Wish Me Dead chu pathumna a ni a, theatre 3,188 aṭangin $2,830,000 a lalut. Beisei angin a hit chiam lo a ni.

Top 10-a film thar lang dangte chu pariatna Finding You leh pakuana Profile-te niin, kar tawp liam taah khan Box Office-ah sum lengvak a tam vak lo. Godzilla Vs. Kong tlangzarh a nih aṭang khan North America Box Office lamah sum a tam ṭan viau a, mahse kar tawp liam taah erawh kha chuan a tla hniam leh hret thung.

Box Office Mojo chart-ah film 43 a awm a, chung zinga film thar dang la awmte chu The Djinn (21), The Killing of Two Lovers (23), Riders of Justice (28), La Piscine (36) leh There Is No Evil (39)-na te an ni.