Ariana Grande-i'n pasal a nei

American singer Ariana Grande chu Dalton Gomez nen an innei niin khawthlang media-te chuan an tarlang.

PA news agency-in a tarlan dan chuan kum 27 mi 'Positions' hitmaker leh Dalton Gomez-te chu tun kar tawp liam taah khan mi 20 aia tlem pungkhawm hmaah an innei a ni.

Grande hian nikum December-ah khan Los Angeles real estate agent kum 25 mi nen hian an inhual tih a lo puang tawh a, tun kar tawp liam taah khan California-a a chenna inah an innei ta niin PA report chuan a tarlang.

Grande leh Gomez-te hian nikum May thlaah khan an inngaizawng tih hi Grande leh Justin Bieber-te music video 'Stuck With U' kaltlang khan an puangzar a, khami hnuah khan social media lamah an thlalak dun eng emaw zat hmuh tur a awm tawh a ni.