UEFA Champions League Final-ah Marshmello

American DJ lar Marshmello chu Union of European Football Associations (UEFA) Champions League Final hawnna ceremony-ah headline a ni dawn.

Porto, Portugal-a May 29-a neih tur UEFA Champions League Final-ah hian Electronic Dance Music star Marshmello hi minute ruk chhung virtual-in a perform dawn a, inlan tur dangte pawh kar leh lamah hi chuan puanchhuah an ni leh dawn bawk.

UEFA Champions League Final-ah hian Dua Lipa leh Alicia Keys-te pawh an lo inlan tawh a, kuminah erawh Marshmello hian show hmuhnawm leh bengfah min thlir tirin min ngaihthlak tir dawn thung.

Ram 200 chuangah UEFA Champions League opening ceremony leh an inkhel hi pek chhuah a ni dawn a, UEFA hian kum 2015 aṭanga an thawhpui tawh Pepsi bawk an thawhpui leh dawn a ni.

Marshmello a perform dawn tih puanzarna video minute khata sei chu YouTube lamah pawh en tur a awm tawh a, chu Video-ah chuan Marshmello bakah Argentine icon Lionel Messi, French star Paul Pogba leh English player Jadon Sancho-te pawh an inlan a, video background-ah nikum lama Mello leh Juice Wrld-te hla tihchhuah 'Come & Go' chu an play bawk.

2021 UEFA Champions League Final hi a tirah tak chuan Istanbul-a Atatürk Stadium-a neih tura ruahman a ni a, Mahse UK-in Istanbul hi Covid-19 vanga a 'red-list' zingah a telh tak avangin Porto lamah hian May 13 khan sawn a nih thu an puang.

Christopher Comstock, Marshmello tia kan hriat lar hi electronic producer khawvelin a ngaih ropui infiamna hunpuia perform hmasa ber tur a ni a, English Premier League club lian pahnih Manchester City leh Chelsea-te inkhelh hmain a khawl rimawi tichhuak thei nen a chevel dawn a ni.