Alicia Keys : Billboard Music Awards leh A album hmasa ber kum 20 tlin lawmna

Billboard Music Awards, May 23-a Microsoft Theater, Los Angeles-a sem tura inlan tur zinga mi Alicia Keys chuan a album hmasa ber 'Songs in A Minor' tlin lawm dan tur a thlang thiam viau mai. Zaithiamte chawimawina zanah hian a album hmasa kum 20 tlin lawmna pualin a album hmasa ber hlate chu medley-in a sa dawn.

Alicia Keys hian June 5, 2001 khan a tlangzarh a, kumin hi kum 20 a tlinna a ni chiah, BBMA-ah hian Keys hian lawm a hlawh ṭhin hle a, nikum lamah pawh khan a album 'Alicia'-a hla 'Love Looks Better' chu lo sa tawh bawkin lawm a hlawh hle.

BBMA hi Keys hian pakua lai a dawng tawh a, kum 2004-ah phei kha chuan zan khatah award pasarih ngawt a hum haw thei a ni. Grammy pawh 15 lai a dawng tawh bawk. Billboard chart-a che ṭha ṭhin tak 'Empire State of Mind' hitmaker hian Billboard 200 No.1 album panga lai a nei tawh a, Hot 100 chart topper No.1 pali a nei tawh bawk a ni.

Alicia Keys hian a album hmasa ber 'Songs in A Minor' hi US Billboard 200 chart-ah a tlangzarh karah topper a nihpui nghal a, kar khat chhungin copy 236,000 a hralh hman hial! US-ah ringawt copy maktaduai 6.2 chuang a hralh a, khawvel pumah phei chuan copy mtd 12 chuang a hralh. He album avang hian Grammy award panga lai a dawng tawh nghe nghe a, chumi a nih avang chuan kum 20 a tlin ropui taka a puanchhuaha a lawm pawh hi a awm hle.

Tunah hian kum 40 lai a ni ve tawh a, studio album pasarih tlangzarh tawhin nikum khan a album hnuhnung ber 'Alicia' a tlangzarh a, he album pawh hi Billboard 200 chart-ah palina a la nihpui thei a ni.

BBMA ceremony-ah hian eng hlate nge a medley dawn tak erawh tarlan a la ni lo thung. Kumin BBMA-ah hian Twenty One Pilots, DJ Khaled ft H.E.R. And Migos, The Weeknd, BTS leh P!nk-te pawh an perform dawn a, Nick Jonas chu host a ni dawn bawk.