Artist 100 Chart-ah Dua Lipa Topper a ni ve ta
Billboard Artist 100 chart-ah English singer Dua Lipa chu topper a ni a, he chart-ah hian No.1 a vawi khat nihna a ni.
Tunhnai kum hnih kum thum vel chhung hian Dua Lipa aia zaithiam lar sawi tur hi an awm tam lo hlein a rinawm a, chuti chung chuan Billboard Artist 100 chart-ah hian topper a lo la ni ngai hauh lo. Tun kar chart-ah erawh DaBaby nena an hla tihchhuah 'Levitating' vangin chartopper a rawn ni ve ta.
London chhul chhuak Dua Lipa hi kar 158 chhung lai chu Artist 100 chart-ah hian a lang tawh, mahse a 'ber' nih erawh a har ṭhin. Kar hmasa lamah khan pasarihna a ni a, tun karah erawh pakhatnaah a rawn invawrh ta a ni.
Dua Lipa vawrhtu chu 'Levitating'
DaBaby nena an hla hit 'Levitating' hi tunkarah hian Billboard Hot 100 chart-ah No.2 a ni a, kar hmasa chhung khan US-ah vawi maktaduai 21.9 lai stream niin copy 19,900 hralh a nih bakah radio airplay audience impression mtd 59.7 a hlawh bawk. Hei hi MRC Data aṭanga a lan dan niin, heng pathumte avang hian kar hmasaa palina a nihna aṭang khan rawn invawrhin Hot 100 chart-ah pahnihnaah a rawn invawrh a, Dua Lipa chu Artist 100 chart topper a rawn nih phah bawk a ni.
Artist 100 chart-a dinhmun sang luahtute
Kar tawp liam ta maia pasal nei thar Ariana Grande chu pariatna aṭangin pahnihnaah a rawn invawrh a, dinhmun sanga ding reng ṭhin The Weeknd chu pahnihna aṭangin pathumnaah a tawlh thla hret thung.
Justin Bieber chu palina niin Luke Combs chu pangana a ni bawk. Kar hmasa lama Artist 100 chart topper DJ Khaled erawh 16-naah a tla thla daih a ni.
The Hot 100 chart-ah 'Leave The Door Open' pakhatna a ni leh
Kar li vel liam taah khan Silk Sonic (Bruno Mars & Anderson .Paak) hla 'Leave The Door Open' chu pakhatna a ni tawh a, pahnihna leh pathumna velahte an awm ren rawn a, tunah erawh pakhatnaah a rawn invawrh leh ta.
Bruno Mars leh a ṭhiante hla mawi dangdai tak mai hi Billboard Hot 100 chart-ah hian kar 10 chhung lang tawhin a sang ber pawlah a la awm char char a ni.
He chart-ah hian Dua Lipa ft DaBaby 'Levitating' chu pahnihna a ni a, Justin Bieber ft Daniel Caesar & Goveon 'Peaches' chu pathumna a ni bawk. Kar hmasa lama pakhatna The Weeknd & Ariana Grande 'Save Your Tears' chu palina a ni a, Doja Cat ft SZA 'Kiss Me More' chu pangana a ni thung.
