FORBE'S WORLD'S BILLIONAIRES TOP 50 LIST

Forbes Magazine-in 2021 World's Billionaire list a tihchhuahah Jeff Bezoz chu a zawna a kum lina atana khawvela mi hausa ber a ni leh a, a hausakna hi USD tluklehdingawn 177 hu a ni.

Kumina list tihchhuah hi Forbe's annual list tihchhuah 35-na a ni a, kum hmasa aiin billionaire hi 660-a pungin mi 2,755 an awm. Heng zinga 493 chu a ṭum khatna atana list-a lang an ni a, nikum chhung khan darkar 17 danah billionaire thar pakhat awm belh zel ang a ni. Kumina list-a lang thar zinga 210 hi China leh Hong Kong-a mi an ni. Kumin billionaire list-a lang zinga 86% hi kum hmasa lam aiin an hausakna hi a pung a, khawvel puma billionaire ho hausakna hi kum 2020 aiin USD trillion 5-in a pung a ni. Kum 2020-a billionaire-te hausakna belhkhawm chu USD trillion 8 a nih laiin, kuminah chuan USD trillion 13.1 a tling.

US chu billionaire ngah ber ram a la ni chhunzawm zel a, mi 724 an awm. China-ah (Hong Kong leh Macao huamin) billionaire 698 an awm bawk. India ramah mi 140 an awm bawk. Asian-Pacific rama billionaire 1,149-te hausakna chu USD trillion 4.4 a ni a, hetihlai hian US billionaire 724-te hausakna chu USD trillion 4.4 a tling pha thung.

2021 World's Billionaire list-a lang thar zinga hausa ber chu US mi, Miriam Adelson niin kumin January thlaa a pasal, Sheldon Adelson-an a thihsan hnua a casino empire a kuta a awm tak avangin list-ah hian a lang thar ta a ni. Lang thar zingah movie leh TV producer Tyler Perry, Bumble dating app cofounder Whitney Wolfe Herd leh payments firm Checkout.com dintu Guilllaume Pousaz-te an tel.

USD tluklehdingawn 100 chuang nei pha hi mi pali an awm. Facebook founder Mark Zuckerberg chu 5-naah awmin, a hausakna hi USD tld 97 ani a, nikuma aia a hausakna punna hi USD tld 42.3 a tling pha. Hei hi kum 2020-a Facebook share 80% zeta a pun vang a ni. Kum 1993 hnua a ṭum khatna atan Warren Buffet hi top 5-ah a lang pha lo a, 6-naah a awm.

Kumina khawvela hmeichhe hausa ber chu France ram mi, cosmetics heir Francois Bettencour Meyers niin, list-ah 12-na a ni.

2021 World's Billionaire list-a lang, mi 2,755 zinga mi 106 chu kum 40 hnuai lam an ni. Self-made billionaire zinga naupang ber chu kum 26 mi, American Austin Russel a ni a, 1,299-na a ni. Hetih lai hian list-a lang zinga upa ber chu kum 99 mi, US insurance tycoon George Joseph a ni thung.

2020 list-a lang zinga mi 61 chu kumina list-ah an lang pha tawh lo a, kumin list-a paih zingah hian Kardashian family member leh makeup entrepreneur Kylie Jenner leh West Virginia Governor Jim Justice an tel.

Mukesh Ambani chu Asia khawmualpuia hausa ber niin, khawvel puma mi hausa 10-na a ni pha. Ambani hian nikum khan Asia-a mi hausa ber nihna chu Jack Ma, hneh aṭangin a lo chhuhsak tawh a ni. Jack Ma hi a tlahniam hle a, nikuma no 17-naah a awm laiin kuminah chuan no 26-ah a tla thla tawh a ni.