Disney Pixar film Onward-in hma a hruai
Box Office-ah film tharin ro a rel nghal a, Disney Pixar film Onward chu pakhatna a ni. The Invisible Man chu pahnihna ni ve thungin The Way Back chu pathuna a ni bawk.
Onward-in hmalam pan loin hma a hruai nghal
Pixar Animation Studios leh Walt Disney Pictures produce computer-animated fantasy film Onward chuan Box Office-ah sum a lalut hnem ber.
Khawthlang mipuite'n animated film an lawmzia an lantir nawn leh a, theatre 4,310 aṭangin $39,119,861 lai Onward hian a lalut a ni. Dan Scanlon film-ah hian aw thawhtu pawh an hrawl hle a, Tom Holland, Chris Pratt, Julia Louis-Dreyfus leh Octavia Spencer-te an ni nawk hlawm. Khawvel puma a sum laklut tawh zat chu $mtd 67.1 a ni a, a hlawhtling hle. Covid-19 leng mek karah hlauthawng taka tlangzarh ni mah se beisei angin a che ṭha a ni.
The Way Back-in beisei ang sum a lalut
Chart hmasaa pakhatna The Invisible Man chu pahnihna a ni ve thung a, $15,132,340 lai a la lalut hman tho a ni.
Ben Affleck leh Michaela Watkins-te channa The Way Back pawh a che ṭha pangngai a, $8,170,315 lai a lalut. He film hi $mtd 20 chuang senga siam mah ni se tunlai hrilengin film industry a nghawng lo thei lo. Chumi a nih avang chuan an beisei sang lutuk ngam lo a, am beisei ang zat vel sum an hmu tho.
Box Office-a kar hnih chhung lai hma hruaitu pawh lo ni tawh Sonic the Hedgehog chu palina a ni ve thung a, chart hmasaa pathumna The Call of the Wild chu pangana a ni thung. Film thar tamna Box Office Box Office top 50-ah hian film thar pariat lai an lang phak. Chart-a lang phak hetiang zat film thar hi tunhnaiah a awm ngai meuh lo a, kumin chhunga film thar tam ṭum tak pawh a ni. Bollywood film Baaghi 3 pawh heng zingah hian telin 17-na a ni ve bawk.
Box Office Top 10
1 Onward $mtd 39
2 The Invisible Man $mtd 15
3 The Way Back $mtd 8
4 Sonic the Hedgehog $mtd 7
5 The Call of the Wild $mtd 6
6 Emma $mtd 4
7 Bad Boys for Life $mtd 3
8 Birds of Prey: And the Fantabulous $mtd 2
Emancipation of One Harley Quinn
9 Impractical Jokers: The Movie $mtd 1.8
10 My Hero Academia: Heroes Rising $mtd 1.7