'I PROMISE' trailer tichhuak

Professional basketball player LeBron James school din 'I PROMISE' documentary film thar tur trailer chu mipuite en theih turin YouTube lamah dah chhuah a ni ta.

Kum 2018 khan James hian a foundation, 'LeBron James Family Foundation' kaltlangin he school hi a din a ni. Ohio-a Akron khuaah a din a, a tirah chuan grade 3 leh 4 kal turte tana class hawn phawt a ni a, a hnuah grade 1 aṭanga 8 thleng kal theihna tur atan hawn leh a ni bawk. 

James hi high school 'dropout' a ni a, a naupan laia an awmna khua Akron-ah hian zirna lama nuapangte'n hmasawnna an neih theihna turin school hi a din a ni. He khuaa an awm lai hian an chhungkua an reithei em em a, a nuin hnathawh mumal tak a neih loh avangin an insawn a ngaih phah fo bawk. Hengte avang hian James chu school kal mumal thei loin a awm ṭhin a, grade 4 a zirlaiin phei chuan vawi 83 lai class a kal thei lo hial. 

Heng harsatnate a tawhte avang hian James chuan kum 2017 November khan an naupan laia a awmna ṭhin khuaah ngei hian zirna ṭha naupangte'n an dawn theih nan leh naupang reithei tak takte khai chhuah an ni theih nan Akron school board-te rawn chhungin school din tur hian nasa takin hma a la a, kum 2018 khan school chu a din thei ta ngei bawk a ni.

'I PROMISE' documentary hi James-a'n school a dinchhoh dan behchhana siam a ni a, kumin April thla hian tlangzarh hman tura ruahhman a ni. He documentary produced tu hi SpringHill Entertainment a ni a, anni hian Verizon Media’s RYOT leh Blowback Productions an thawhpui bawk.