Eurovision-ah Italian Rock Band Måneskin an chak

European Broadcasting Union (EBU)-in kumtina an buatsaih ṭhin Eurovision Song Contest 2021 chu Inrinni khan a hmawr bawk a ni ta a, Italian Rock Band Måneskin chu pakhatna an ni.

Kumin Eurovision Song Contest hi Rotterdam, Nether­lands-ah neih niin Måneskin hian an hla “Zitti e buoni” chu an chakpui a, French singer Barbara Pravi chu pahnihna niin Switzerland aiawh Gjon’s Tears chu pathumna a ni thung.

Pakhatna an ni tih puan chhuah a nih hnua stage-a an koh chhuah hnuah Måneskin frontman Damiano David chu,"Europe pumpui leh khawvel pum hnenah hei hi kan sawi dun a ni, Rock and Roll a thi ngai lo," tiin a au chhuak a, kalkhawm mipuite thawm a ring hle.

Rome lam chhuak glam-rock group hi an singer chu Damiano David a ni a, an bassist chu nula chhe lo tak Victoria De Angelis niin, guitarist Thomas Raggi leh drummer Ethan Torchio-te an ni.

Kum 1990-a pakhatna an nih bak kha Italy chu he intihsiaknaah hian pakhatna an la ni leh lo a, kuminah pakhatna an nih takah hian nakkum lam Eurovision Song Contest chu Italy lamah neih a ni ang. Italy hi kum 1990 leh 1964 khan pakhatna an lo ni tawh a ni.

Kumin hi Eurovision song contest an buatsaih vawi 65-na a ni a, kum hnih liam taah khan Netherlands aiawh Duncan Laurence pakhatna a nih avangin kuminah hian Rotterdam, Netherlands-ah hian an nei a ni. Nikumah khan hripui a len nasat avangin Eurovision hi an buatsaih lo.

Kumin Eurovision song contest-ah hian ram 39 an tel a, UK aiawha tel James Newman chu tichhe ber niin point a hmu lo! UK hi he intihsiaknaah hian vawi nga lai tichhe ber an ni tawh a, point an hmuh loh ṭum hnihna a ni bawk.

Eurovision song contest hi kum 1956 aṭanga an buatsaih ṭan tawh kha niin, kumtin an buatsaih ṭhin a, international televised music competition kumitina buatsaih ṭhinah chuan a rei tawh ber a, khawvela TV programme kalpui rei ber zinga mi a ni bawk. ABBA, Celine Dion leh t.A.T.u.-te pawh kha Eurovision aṭanga lar chhuak an ni.