Stairway To Heaven copyright case-ah Led Zeppelin-in thiam an chang

British rock legend Led Zeppelin chuan an hla hit Stair­way to Heaven vanga thu­buai an neihah thiam an chang. 

He hla chanchin ngah tak mai 'riff' hi US band Spirit chuan kum 2014 khan an hla Taurus riff copy-ah an puh a, thubuai an thehlut a ni. Taurus hi kum 1968 khan tihchhuah a ni a, Stairway To Heaven hi kum 1971-a tihchhuah a ni thung. Taurus-a guitar riff ṭhenkhat leh Stairway To Heaven introduction music chu a inhnaih hle niin an puh. 9th US Circuit Court of Appeals, San Francisco chuan thutlukna siamin Led Zeppelin chuan Taurus hi an copy lo tih a puang ta a ni.

Thiam chang lo se chuan Stairway To Heaven phuahtu Led Zeppelin singer Robert Plant leh guitarist Jimmy Page-te chuan pawisa tam tham tak an chawi a ngai dawn a, mahse hei hi an pumpelh thei dawn ta a ni. Led Zeppelin leh Spirit hi live-in an perform dun tawh a, heihi Taurus an tihchhuah hnuah hian a ni. Hemi a nih avang hian thubuai thehluhah pawh hian Page hian live-a Taurus an play a ngaihthlak hnu hian an riff chu a ru ta niah an puh a ni.

Guitar solo nalh thlan apianga tel ve ziah chu Stairway To Heaven-a Jimmy page guitar solo kha a ni. Guitar World leh The Top Tens phei chuan Greatest Guitar Solo-ah an thlang hial a, guitar solo nalh thlang ṭhintu magazine hrang hrang pawhin top 3-ah chuan an telh deuh ziah ti ila a sual tam lo ang.

A hla hrim hrim bawk hi mi tam tak chuan rock hla ṭha berah an ngai a, music variation chi thum anga a inṭhente hi mi tam tak sawi nuam tih a ni bawk. A hla phuah dan chungchang leh a hlathu hrim hrim pawh hian ngaihven a hlawh hle a ni.