Freddie Mercury comic siam a ni dawn

Rock icon Freddie Mercury chuan ama pual gra­phic novel a nei dawn a, November thla velah hi chuan an tlangzarh hman mai thei.

Queen frontman fam ta Freddie Mercury comic hi 'Freddie Mercury: Lover of Life, Singer of Songs' tih a ni dawn a, a naupan lai, Zanzibar leh India-a hun a hman lai aṭanga UK-a a insawn dan te, Queen a zawm chhoh dante tarlan a ni dawn.

He graphic novel hi Tres Dean chuan a ziak dawn a, Universal Music Group, Z2 Comics, leh Mercury Songs Limited-te nen an thawk ho dawn a ni.

Greg Brooks leh Simon Lupton-te Freddie chanchin lakhawma lehkhabu an lo tihchhuah tawh 'Freddie Mercury: A Life, In His Own Words' aṭanga he project hi an ngaihtuah chhuah a ni a, Kyla Smith, Robin Richardson, Safiya Zerrougui, Tammy Wang, leh Amy Liu-te pawhin he comic-ah hian kuthnu an nei ve dawn niawm tak a ni a, David Mack chu a cover-a milem ziaktu a ni thung.

Kum 2018 khan Freddie Mercury biopic 'Bohemian Rhapsody' chu tihchhuah lo ni tawh bawkin a hlawhtling hle a, kha film siamna atan khan $mtd 50-55 vel an sen laiin Box Office aṭangin $mtd 904 chuang an hmu chhuak!

Rock legend Mercury kha a hming tak chu Farrokh Bulsara a ni a, kum 1991 khan kum 45 mi niin AIDS vangin a thi a ni.