2021 Billboard Music Awards : The Weeknd - Grammy-ah hnáwng mah se Billboard lamin ropui takin an lo làwm

2021 Billboard Music Awards chu Pathianni zanah khan Microsoft Theater, Los Angeles, California-ah sem a ni ta a, Nick Jonas chuan hnehsawk taka host-in, kumin Grammy-a nomination pakhat pawh hmu lo Canadian singer the Weeknd chuan Award 10 lai a PAWM haw NAWLH!

DJ Khaled, H.E.R. leh Migos-te chuan 'We Going Crazy' hmangin show an hawng a, performance hmuhnawm tak tak hmuh tur awmin, Michella Obama pawh inlan zuaiin, Jonas Brothers leh Marshmello-te chuan show an khar a ni. Show kharnaah hian Jonas Brothers hian an hla panga vel lai an medley a ni.

Puanzar lawka awm angin Pink chuan Billboard Icon Award a dawng a, Trae tha Truth chuan Change Maker Award dawngin, Drake chu Artist of the Decade Award hlan a ni bawk.

The Weeknd ropui zan chu...
'Blinding Lights' hitmaker The Weeknd hi kumin BBMA nomination puan a nih khan nomination hmu tam ber a ni a, 16 lai a hmu. Grammy lamah lungawi lo hle mah se, Billboard Awards semna lam erawh phur takin a pan dawn tih a chiang.

Award an sem hmasak ber top Hot 100 artist award chu a dawng nghal phawt a, a 'suit' dum nen award chu rawn dawngin, a 'suit' sen a hak a ngai tawh lo chu lawmawm a tih thu fiamthuin a rawn sawi zeuh a, mipuiin an lawm dar dar hle.

Chutah award ceremony a kal chho zel a, show a zawh meuh chuan award a maka maka tam- Top Artist, Top Male Artist, Top Hot 100 Artist, Top Radio Songs Artist, Top R&B Artist, Top R&B Male Artist, Top R&B Album, Top Hot 100 Song Presented by Rockstar, Top Radio Song leh Top R&B Song-te chu a pawm haw ta nawlh mai a ni.

Canadian singer hian a tana zan ropuiah hian Los Angeles parking lot-ah 'Save Your Tears' chu a perform bawk. He a peformance choreograph hi a dangdai a, a hmuhnawm a, a hautak hle bawk ang tih a hriat.

Award a dawnnaah, "After Hours hun a zo tawh a, tunah chuan khawvar (Dawn) a thleng dawn ta," tiin mei nei deuhin a sawi zeuh a, hei hi eng emaw thil thar a tichhuak dawnah a ngaih theih ang.

Award dawngtu langsar dangte
Fam ta Pop Smoke chuan award panga lai a dawng a, chung zingah chuan Top Billboard 200 Album leh Top Rap Artist-te pawh a tel a ni. A aiawhin a nuin award hi a laksak.

Taylor Swift pawhin award pahnih Top Female Artist leh Top Billboard 200 Artist award a dawng leh a, Morgan Wallen pawhin award pathum a dawng bawk.

Carrie Underwood 'My Gift' chu Top Christian Album-ah thlan a ni a, Elevation Worship (featuring Brandon Lake) 'Graves into Gardens' chuan Top Christian Song award a dawng bawk a ni.

BTS = Nomination 4, Award 4
Zirtawpnia an hla tihchhuah thar 'Butter' a vawi khatnaa atana live-a rawn sa chhuaktu Bangtan Boys chuan nomination an hmuhna zawng zawngah award an dawng vek!

BTS hian kumin BBMA-ah hian nomination pali- Top Duo/Group, Top Song Sales Artist, the fan-voted Top Social Artist leh Top Selling Song (for “Dynamite”)-ahte an hmu a, chung zawng zawngah chuan award an dawng vek. Korean superstar-te hian Seoul aṭangin award hi an dawng a, ARMY-te chungah lawmthu an sawi bawk a ni.

P!nk nge nge
Icon Award dawngtu P!nk chu a che ṭha leh pek hle. Rock icon Bon Jovi kut aṭangin award a dawng a, Bon Jovi hnenah chuan,"I lo hre tawh tho mai thei, Dorothea nen in inneih khan kar khat chhung ka room ka chhuahsan lo," tiin nui chunga sawiin, "Kum 8 lek ka la ni a, banga i lem ka tar chu ka pawt thler a, Sebastian Bach lemin ka thlak.

I hmangaih i tawng hi ka lawm a, mahse ka rilru i tina! He hi ngaihdam dilna angin ka ngai a, ka pawm e," tiin Bon Jovi bulah chuan a ngaihsan ṭhinzia a sawi. Mipui thawm pawh a ring viau mai. A fan-te hnenah an thlawp tlat ṭhin avangin lawmthu a hrilh a, a thusawi a tihtawpna atan heti hian a sawi, "Duhthusam ropui tak nei rawh u, a lo thleng dik thut mai thei asin," tiin. P!nk hi a perform bawk a, a hla hit hrang hrang sain, 'Cover Me in Sunshine'-a a fanu nena stage an chevel chuan sawi zui a hlawh hle.