Mystical Mizoram Ṭhazual Lengzem : Jenny Jathang 'Kaltir rawh le' pakhatna a ni

Mystical Mizoram Ṭhazual Lengzem chart-ah chart-a mikhual tawh lo tak Jenny Jathang 'Kaltir rawh le' chu pakhatna a ni a, Grace 10:45 'Kumtluangin' chu pahnihna niin Manuna 'Ṭha Sensiar' chu pathumna a ni.

Pakhatna Jenny Jathang 'Kaltir rawh le'
Ṭhazual chart-a lo che ṭha tawh ṭhin tak Jenny Jathang hian a hla mawi tak mai 'Kaltir rawh le' hi kumin kumtir lamah khan a tichhuak a, kumin chhunga Lengzem hla ngaihthlak hlawh pawl tak a ni.

Music Video hmuhnawm tak nena a tihchhuah, Puipuii Hauhnar hla phuah 'Kaltir rawh le' hian thla li chhung vel lekin YouTube lamah pawh thlirtu nuai thum dawn a nei hman a, a hla a mawi bakah Jenny hian a sa thiam bawk a, viewer a ngah pawh hi a mak lo a, chart-a pakhatna a ni pawh hi a phu viau mai.

He hla hi a tihchhuah aṭanga rei loteah khan chart-ah a lang nghal a, chart hmasa lamah khan pahnihna niin tunah erawh pakhatna a rawn ni ta a ni.

Top 3-ah Grace 10:45 leh Manuna
Grace 10:45 hla 'Kumtluangin' chu pathumna aṭangin pahnihnaah a rawn inhlangkai ve leh ta a, 'No Khat Chauh' hitmaker Grace 10:45-i hla thar ber hi a mawi bawk a, a dinhmun pawh a ṭha sawt hle a ni.

Pathumna Manuna hi chu Ṭhazual chart-a hming langsar pawl tak a ni. Tunah a hla 'Ṭha Sensiar' hmangin top 3-ah a rawn inhlangkai leh ta a, vawi eng emaw zat topper a lo nih tawhna chart-ah hian pakhatna a ni leh thei dawn em tih chu hriat a chakawm tawh hle.

Mathlenga 'Ka Duhaisam' chu palina a ni ve bawk.

Chart-ah Jt-a hla pahnih a lang
Mizo lengzem singer zinga tunhnaia thawm ring ber pawl Jt Production chuan Ṭhazual chart-ah hla pahnih lai a lanpui.

Siampuii Ralte nena an sak dun 'Ka Hmangaih te' chu pangana a ni a, ' Khuanu Ruat Loh' chu 10-na a nihpui bawk.

Chart-a hot zel
Ṭhazual chart top 10-a langte an ṭha hle. A chunga kan sawilan ho bakah hian Essy, Jaui, Clara leh Ngurthansanga Kawlni te pawh an la lang a, Ṭhazual Lengzem chart hi a la hot chho telh telh dawn tih a chiang.