Box Office-ah Spiral: From the Book of Saw Pakhatna a ni leh

North America Box Office-ah kar hmasa lama pakhatna Spiral: From the Book of Saw bawk pakhatna a ni leh a, chart dinhmun sang lamah thil danglam liantham thleng a awm lo.

Spiral a la hit zel
Spiral: From the Book of Saw hi kar hmasa pawh khan pakhatna a ni tawh a, he film hi Saw franchise tho niin kum 2017-a Jigsaw hnua Saw franchise tihchhuah leh hmasak ber a ni.

Kar tawp liam ta chhung khan theatre 2,991-ah tihchhuah niin $4,595,320 lai sum a lalut leh a, a sum lakluh tawh zawng zawng chu $maktaduai 22.5 a tling tawh. Spiral hi horror film niin Saw franchise pakuana a ni tawh a, tunah hian a chhunzawmna Saw X Twisted Pictures chuan siam leh turin hma an la mek bawk.

He film-ah hian Chris Rock a chang a, Max Minghella, Marisol Nichols, leh Samuel L. Jackson-te pawh an chang a ni. Rotten Tomatoes lamah chuan rating 5/10 hmuin mi 188-in an review aṭanga a hmuh a ni a, hemi rating aṭang hi chuan film hmuhnawm pangngai tak a ni a tih theih ang.

Top 5-a film langte chu...
Action film Wrath of Man chu pahnihna ni lehin theatre 3,007 aṭangin $2,978,090 a lalut a, kar hmasaa pathumna Those Who Wish Me Dead chu pathumna bawk a ni leh.

Raya and the Last Dragon chu a dinhmun danglam leh hretin pangana aṭangin palinaah a rawn insawn a, Godzilla vs. Kong chu top 5 khartu a ni thung.

Pahnihna leh pathumna hi theatre sang thum chuangah an tichhuak a, a bak zawng hi theatre sang hnihah an chhuah tling ve bawk. Hei hian US-ah chuan theatre an hawng tam leh tawh hle tih a tilang a ni.

Film thar
Top 10-ah film thar lang pakhat chiah a awm a, chu chu pakuana Dream House a ni. Tin, Scoob! kha tlangzarh thar leh bawkin pariatna a ni thung.

Box Office Mojo-in kartawp chart an tihchhuahah film 44 an tarlang a, chung zingah chuan New Order (18), Final Account (19) leh The Dry (20)-nate chu film thar a ni bawk.