NMPA Songwriter Icon Award Taylor Swift-in dawng dawn

National Music Publishers Association (NMPA) official-te chuan Taylor Swift chu Songwriter Icon Award an hlan dawn tih an sawi.

'Shake It Off' singer Taylor Swift hi hmeichhe zinga Grammy Album of the Year pathum dawng thei awmchhun a ni a, June 9-a NMPA annual meeting-ah he chawimawina hi an hlan dawn a ni.

Thuchhuah an siamah NMPA president leh CEO ni bawk David Israelite chuan,"Taylor Swift hian mak danglam takin hlawhtlinna a chang a ni. Khawvelin a mamawh lai takin a hla phuahte a pe," tia sawiin a fak hle. "Hlaphuah thiam a nihna angin hriat a ni hmasa zawk reng a ni," tia sawiin Icon Award chu Swift aia phu an awm loh thu a sawi.

NMPA hian County Music Association CEO Sarah Trahern hnenah Industry Legacy Award an hlan dawn bawk a, hlaphuah thiam leh music publisher-te humhimna kawnga che ṭha chawimawina President's Award chu New York Congressman Jerrold Nadler hnenah an hlan dawn bawk.

Kumtina NMPA in an neih ṭhin meeting chu kumin hian virtual-in an nei dawn thung a, nikum lamah pawh khan hrileng vangin virtual-in an lo nei tawh a ni. Luke Bryan leh Sara Bareilles-te chu kumin an meeting-ah hian an inlan dawn bawk a ni.