Eurovision song contest winner Måneskin vocalist-in ruihhlo a hmang...hmang leh lo!

Europe khawmualpui leh rimawi khawvelin inelna a ngaih­hlut Eurovision song contest winner, Italy ram aiawhtu Måneskin vocalist Damiano David chu ruihhlo hmanga puh a nih hnuah a hmang leh lo tih finfiah a ni.

Eurovison vawi 65-na-a pakhatna Italian glam-rock band Måneskin hi pakhatna an nih hnuah thuthar thehdarhtute'n press conference-ah an kawm zuia, chutah chuan Damiano David hi dawhkan lamah a kun zeuh avangin mi tam tak chuan cocaine a zuk hip zeuh niin an ngai a, hemi chungchang hi a darh nasa nghal hle.

Måneskin pawhin hemi chungchangah hian thuchhuah siam nghalin video en apiang chuan an sawi uar mah mah tih an hriat theih thu leh endik pawh an huam thu an sawi. Social media lamah pawh ruihhlo an duh loh thu leh cocaine an hman ngai loh thu uar takin an tarlang zui a, David pawh Italy an thlen hnuah ruihhlo a hmang em tih endik niin a hmang lo tih finfiah a ni tawh bawk.

Kumin Eurovison winner band-te hi middle school an kal lai aṭanga inhre tawh hlawmin David bakah hian bassist Victoria De Angelis, guitarist Thomas Raggi leh drummer Ethan Torchio-te chuan kum 2015 khan an band hi an din a, an band hming hi Danish ṭawng niin 'Thla eng' tihna a ni.

Kum 2017 khan X-Factor Italia-ah pahnihna niin chumi hnuah chuan hriat an hlawh chhunzawm hle a, Inrinni liam taa a hmawr an bawk tak Eurovision song contest 2021-ah Italy ram aiawhin an hla 'Zitti e Buoni' chu pakhatna an nihpui. He hla Spotify Global Chart top 10-ah lang zui nghalin, Italy-ah phei chuan ni khata hla stream tam ber record a siam hial. Tunah hian Europe ram hrang hranga tour nei turin an inbuatsaih mek a ni.