The Prophets hla thar 'Siamtu Pathian' a ngaihnawm dawn
Mizo Pathian fakna hla thar ṭha tak zanin hian ngaihthlak tur i nei dawn a, lo inring rawh le. Rock band kan neih ṭhat ber zinga mi The Prophets chuan zanin hian Zonet-ah an hla thar 'Siamtu Pathian' an tichhuak dawn.
NIT Thundermarch National Rock Contest-a pakhatna lo ni tawh, khawvelin a ngaihhlut Nagaland Hornbill International Rock Contest-a pathumna leh pahnihna pawh lo ni tawh, record nei ṭha The Prophets hla thar tihchhuah tur hi a mawi dawn hle tih a chiang. I beisei lo tisang tawp mai teh.
Mit leh Beng a tlai dawn
'Arora' hitmaker-te hla thar tur hi a mawi dawn a, music an remkhawm uluk a, Mizo rilrem zawng tak hla a nih hmel bawk.
An hla an khuhhawnna music ringawt ngaihthlak phei chuan Mizo kuthnu a ni lo emawni le, tih tur a ni hial!
A hlathu a ṭha a, Pathian chu thil zawng zawng siamtu, mita kan hmuh theih leh kan hmuh phak loh thleng pawh siamtu a nihzia tarlanna hla niin, chung avanga fak tlak Pathian ropui ber a nihzia puanchhuahna hla a ni. He hla hi The Prophets kut chhuak liau liau a ni bawk.
Mizo drummer ṭha ber pawl Mamoia Colney kuthnu mawi zia hriat nawntirin i awm dawn a, Roney-a 'voice range' zau zia, rock contest lian thama best vocalist a la fo kha thilmak a nih lohzia i hre thar leh bawk ang. Eric Renza guitar perh ri a mawi ṭhin zia sawi nawn a ngai lo a, Bassist Gordon leh Keyboardist Samuel-a te kuthnu mawi zia pawh sawi nawn a ngai bawk hek lo. Hla thar tichhuak zut zut lem lo mah se The Prophets an nihzia zanin hian an rawn lantir leh dawn a ni.
Music video a hmuhnawm dawn a, a hla nena inmil tak video kan hmuh dawn bakah tunlaia model hriat hlawh tak Ruatpuii Bawihtlung kan hmu leh dawn bawk.
Kar khat hnuah YouTube-ah
The Prophets hian an hla thar hi MDM lama register fel tawhin zanin hian Zonet lamah an pe chhuak phawt ang a, kar khat hnuah MDM YouTube channel lama duh hun huna thlira ngaihthlak theihin an dah chhuak ang.
Vocalist Ronnie chuan The Prophets hian an YouTube channel-ah an hla hrang hrang an dah dawn tih Vanglaini a hrilh bawk a, an rimawi ngainatute tan chuan a ngaihven chi viau dawn a ni.
The Prophets hi Mizo band zingah chuan record nei ṭha ber zinga mi a ni a, Hornbill International Rock Contest 2017-ah khan pahnihna niin hemi ṭum hian Best Vocalist lawmman an dawng tel bawk a, a hma kumah pathumna ni tawhin, chumi ṭum pawh chuan Best Vocalist lawmman Ronnie hian a dawng tho bawk.
Silchar NIT-a Thundermarch National Rock Contest 2016-ah pawh pakhatna an lo ni tawh a ni.