'Friends: The Reunion' India ramah entu an pung chak

Friends: The Reunion chu Ningani khan khawvel ram hrang hranga en theih turin pek chhuah a ni a, India ram bikah chuan ZEE5-ah stream theih niin darkar rei loteah mi maktaduai chuangin an stream nghal tih nimin khan tarlan a ni.

ZEE5-a stream zat hi a la pung mek zel bawk tih tarlang telin US lama an pek chhuahna HBO Max lam chuan nimin thleng khan data an la tichhuak lo thung.

Friends: The Reunion hi a inmungna a rei tawh a, nikum lamah khan HBO Max streaming service khuh hawnna atana tihchhuah an tum tawh kha niin Covid-19 hripui leng vangin an sawn hla zel a, HBO Max kum khat tlinna chiah, Ningani khan tihchhuah a ni thei ta a ni.

Reunion show-ah hian Jennifer Aniston, Courteney Cox, Lisa Kudrow, Matt LeBlanc, Matthew Perry, leh David Schwimmer-te chu an inlan leh vek a, anni bakah hian special guest eng emaw zat awmin chung zingah chuan David Beckham, Lady Gaga, Kit Harington, Reese Witherspoon, Malala Yousafzai leh BTS-te pawh an tel.

Friends: The Reunion show hian khawvel ram hrang hranga an fan-te rilru a tithar a, mi tam tak chu hlim leh lawm avangin an mittui a tla bawk tih social media-a comment hrang hrang aṭangin a hriat theih.

Deadline-in a tarlan dan chuan he reunion show atan hian $maktaduai 20 vel an seng a, a changtu parukte hian $mtd 3-4 vel ṭheuh an hlawh an ring. Variety erawh chuan $mtd 2.5 vel ṭheuh an hlawh dawn niin an tarlang thung a ni.