ṬHAZUAL FAKNA No.1-ah One In Christ 'Zing Daifim'

Hripui leng vanga hun eng emaw chen inkharkhip kalpui a nih avanga Ṭhazual chart tih chhuah a nih loh hnuah chhunzawm a ni leh ta a, Ṭhazual fakna chart tih chhuah leh hmasa berah One In Christ 'Zing Daifim' chu No. 1 a ni a, Rintea ft. Hmingpuia 'Ka lawm zel ang' chu pahnihna niin Manuni 'Eng ka hmu ta' chu pathumna a ni bawk.

Thla li liam ta vela an tihchhuah 'Zing Daifim' chu One in Christ chuan Ṭhazual chart-ah No.1 an rawn nihpui a, he music video-ah hian May 22-a an member boral ta Lalruatdiki Chhangte pawh a la inlan a ni.

TV lamah thlan hlawh ber a ni mai lo a, YouTube lamah pawh thlirtu nuai chuang an awm der tawh a ni. He hla hi V.Lalhunmawia (Lamawia) phuah a ni a, nikuma an album tihchhuah 'Kei kher maw Lalpa?'-a mi kha a ni a, music video a hmuhnawm piah lamah ngaihthlak a manhla hle.

OiC hian Ruatdiki pual hian Inrinni kha music video pahnih an YouTube channel-ah an dah chhuak a, June thla tawp lam emaw July thla tirah emaw hi chuan hla thar tihchhuah leh an tum bawk.

February thlaa Albatros duo Rintea leh Hmingpuia-te'n an tihchhuah 'Ka lawm zel ang' tih chu pahnihna a ni a, Rintea leh Hmingpuia hi tute nge an nih sawi nawn a ngai lo a, chart-a No.2 an la ni thei hian an la chuai lo tih a lantir chiang hle a, Rintea zai mai piah lamah Hmingpuia guitar zut pawhin mi tam tak beng a fah tih a chiang.

Manuni'n Hillsong hla 'See the light' Mizo ṭawnga a lehin, amah ngeiin a sak 'Eng ka hmu ta' chu pathumna a ni bawk.

Fiona Lalmalsawmi'n nikum kum tawp lama a tihchhuah, Jazz music lam hawia thiam taka a sak 'Krista a lawmna' chu palina niin Mawitea chuan a hla 'Chibai ka buk che' hmangin top 5 a khar a ni.

1    One In Christ     - Zing Daifim

2    Rintea ft Hmingpuia     - Ka lawm zel ang

3    Manuni     - Eng ka hmu ta

4    Fiona Lalmalsawmi     - Kristaa lawmna

5    Mawitea    - Chibai ka buk che

6    Vanlalruata     - Jehova

7    Sword Tune     - Rawn pan rawh

8    Zoremtluanga     - A tharin a awm

9    Zorema Khiangte     - Saltang tawngtaina

10    Lalthlengliani Jongte     - A hming fak la