Champions League Final-ah Marshmello-in mit leh beng a titlai
Union of European Football Associations (UEFA) Champions League Final Inrinni zana khelh zawh tak, English Premier League Club CHELSEA ropui taka an champion zana opening ceremony show headline 'Marshmello' inlan dan pui tak khan sawizui a hlawh a, internet lama comment ṭhenkhat chuan Super Bowl Half Time show-a The Weeknd performance nen khaikhinin, ṭhenkhat chuan Marshmello inlan dan kha a ropui zawk ni te pawhin an ngai hial.
Porto, Protugal-a minute ruk lek 'virtual'-a a inlanna tur khan kum hnih chhung zet rilru leh theihna, tha leh zung sen a ni. Dua Lipa kum 2018-a a inlan leh Imagine Dragons kum 2019 UEFA Champions League final-a an inlan hnuah khan a kum leh, kum 2020-a inlan tur chu Marhsmello hi a ni, mahse kan hre ṭheuh a, nikum lamah hri a len avangin a inlan thei ta lo a, kuminah ropui takin, sawi zui luai luai hlawh khawpin a rawn inlan ta a, a kiangah Salena Gomez leh Khalid-te an inlan bawk a ni.
Chuti chuan engtin zel?
Inrinni zana khawvelin performance hmuhnawm a thlir theihna atan khan kumin March thlaah khan Long Beach, California-a industrial area-a soundstage-ah engineer rual, lam thiam rual, khuangpu rual, virtual leh extended reality lama mithiam bik, choreographer ṭha tak tak, designer thiam rual leh electronic music superstar pakhat an pungkhawm a, an theihna hrang hrang an sawm khawm a ni.
Ni thum chhung lai shooting neiin superstar producer Marshmello, a hming tak Christopher Comstock chu European football stadium-a a tak ang maia a inlan theihna turin mithiam rual kalkhawm chuan an thiamna hrang hrang hmangin hma an la. Chu thilmak tihlawhtling tur chuan 'Mello pawhin a thiamna tualzual piah lam thil a tih a ngai.
"Choreography lam hi ka la tih ngai miah lo a ni. Mahse Lam kan zir a ngai," tiin Comstock chuan a thiamna piah lam thil a zir a ngaih thu a sawi ve mauh mai.
Virtual-a a inlan chhan chu
Marshmello management company The Shalizi Group chief operating officer (COO) Krista Carnegie chuan nikum nipui aṭang tawh khan a taka inlan turin nge an inbuatsaih a, digital pumhlum turin tih an ngaihtuah nasa hle tih sawiin a tawpah chuan digital lam chuan an rilru a awn ta zawk tih a sawi.
2021 Super Bowl halftime show-a The Weeknd-in a lo thawhpui tawh creative director Es Devlin ngaihtuahna hmang thoin kumin UEFA Champions League final-ah khan Marshmello hi a inlan a, Krista Carnegie chuan thil harsa tak a nih thu sawiin, stadium-a tui leh van(sky) awm ngaite chu thil tihhlawhtlin harsat tak a ni, a ti.
Istanbul atana an inbuatsaihna a tlawlh
Ruahmanna hmasaah chuan Istanbul stadium-ah Champions League final kha neih tur a ni. Chumi a nih avang chuan Marshmello perform-na tura production team-te chu Istanbul stadium lamah nasa takin an inbuatsaih hman a, Comstock a tak ang thei bera a inlan theihna turin stadium kil tin hmaih miah loin thla an la vek hman a, mahse Porto lamah an insawn a ngai leh ta si a ni.
An inbuatsaihna chu a thlawn mai dawn emaw an tih laiin vanneih thlak takin Porto Estádio do Dragão-a an facility-te chu a la thar khawp mai a, chumi a nih avang chuan technical drawing awmsa hmangin stadium wide shot pawh an tiṭha leh thei a, stadium shot an thlak ngai lai chu 'crew' lam chuan an hriatchian em avangin Istanbul atana an buatsaihna tam tak chu an hman chhunzawm thei ta tho a ni.