African Violet chi thar Mizoramah hmu chhuak

Pangpar chi khat African Violet chu India rama a vawi khatna atan Mizoramah hmuh chhuah a ni.

The Hindu-in an tarlan dan chuan Indian Institute of Science Education and Research (IISER) Bhopal chuan African Violet chi khat Mizoramah an hmu chhuak a, an pangpar chi hmuh chhuah thar hi Didymocarpus vickifunkiae tia vuahin Myanmar nena inrina hmun pathumah an awm tih an finfiah tawh a, thil nung mang mai hlauhawm zinga mi a nih thu an tarlang bawk.

Epiphyte, thingkunga ṭo chi niin fur laiin par senno a chhuah ṭhin a, US-a Smithsonian Institute-a thawk botanist Vicki Ann Funk hmingchawiin he pangpar hming hi an phuah a ni.

Amercian Soceity for Plant Taxonomists-in an journal tihchhuah ṭhin Systematic Botany-ah an thil hmuh chhuah thar hi tarlan niin, research scholar Prasanna N.S. leh Vinita Gowda, IISER Bhopal-a Biological Sciences Associate Professor-te hmingin an tlangzarh.