Mystical Mizoram Ṭhazual Gospel Stacy Punte 'Ka Ṭhatna Tur a Hria' pakhatna a ni

Mystical Mizoram Ṭhazual Gospel-ah Leitlangpui tleirawl zaithiam Stacy Punte chu pakhatna a ni a, a hla 'Ka Ṭhatna Tur a Hria' hmangin chart topper a ni.

Stacy Punte 'Ka Ṭhatna Tur a Hria' ngaihthlak a manhla
Ṭhazual Award 2020 leh Lelte Award 2020-a New Artist Award dawngtu Stacy Punte zai hi a ngaihnawm lo thei lo. Tuna chart topper a nihpui 'Ka Ṭhatna Tur a Hria' kumtir lama a tihchhuah kha niin Lalnunpuia Hrahsel hlate Album volume 5-a mi kha a ni.

He hla hi Mizo rilrem zawng tak niin ngaihthlak a nuamin a hahdam hle a, YouTube-ah ama channel lamah upload-in thlirtu nuai 1.6 chuang lai an awm tawh a, ngaihthlak nuam kan ti tlang tih a hriat.

Chart-ah he hla hi mikhual tawh lo hle a, May thla tir lamah khan top 5-ah rawn inhlangkaiin, chart hnuhnung berah khan pahnihna niin tunah chuan pakhatna a rawn ni ta a ni. Music Video a hmuhnawm a, a hlathu a ṭhat piah lamah Stacy a zaithiam bawk nen, 'Ka Ṭhatna Tur a Hria' hi hla ngaihthlak manhla tak a ni.

Maruati & Hlimhlimi pahnihna an ni ta
Gospel singer kan neih ṭhat ber zinga mite pahnih Maruati leh Hlimhlimi te thawkdunin Nehehmia Chhangte hla phuah an sak 'Uain Thar' chu pahnihna a ni. Hei pawh hi chart-a a inlanna a rei tawh a, dinhmun ṭha ber lam a pan mek zel a, a dinhmum pawh a ṭha sawt hle.

Chart top 5-te chu..
'Saltang Ṭawngṭaina' thiam taka satu Zorema Khiangte 'Isua a Awm' chu pathumna a ni a, Amtea & Zorinsanga Sailo 'Kan Beiseina Isua' chu palina niin K. Lalremmawia 'Rawn Hruai Haw Rawh' chu pangna a ni bawk.

Chart top 10-a lang zingah Hmingtea Chhangte leh One In Christ-te pawh an tel a ni.