'Tarzan' star Joe Lara a thi

'Tarzan: The Epic Adventures'-a Tarzan lema chang Joe Lara chu kum 58 mi niin Inrinni khan thlawh­theihna chesualah a thi.

Joe Lara hi a nupui leh midang panga nen private jet-ah chuangin TMZ-in a report dan chuan Inrinni khan Nashville khawpawna awm Smyrna Airport aṭangin Palm Beach lam panin an thlawk chhuak a, Nashville chhim lam km 19 vela hlaa awm Percy Priest Lake-ah an thlawhtheihna chu a tla niin Florida, Rutherford County Fire & Rescue (RCFR) chuan an tarlang.

Federal Aviation Administration chuan thlawhtheihnaa chuang zawng zawng chu an thi vek tih an sawi a ni.

William Joseph Lara hian American TV series kum 1996-97 inkara tihchhuah 'Tarzan: The Epic Adventures' vangin hriat a hlawh hle a, kum 1989 khan Tarzan in Manhattan-ah pawh Tarzan lemah a lo chang tawh bawk.

Baywatch-ahte pawh khan a lo inlan zuai tawh a, film hrang hrang 20 dawnah inlan tawh bawkin TV show eng emaw zatah a inlan bawk a ni.